Aqmolalyq semserlesýshi Qazaqstan chempıony boldy
ASTANA. QazAqparat - Semserlesýden ótken Qazaqstan chempıonatynda aqmolalyq semsershiler «altyn» men «qola» medal jeńip aldy. Bul jaıynda Aqmola oblystyq dene tárbıesi jáne sport basqarmasynyń baspasóz qyzmetinen málim etti, dep habarlaıdy QazAqparat tilshisi.
«Almatyda kadetter arasynda semserlesýden respýblıka chempıonaty ótti. Medal ıelenip, elimizdiń qurama sapynyń qataryna kirý úshin respýblıkanyń kóptegen oblysynyń sportshylar baq synady. Tartysty ótken jekpe-jekter barysynda Aqmola oblysynyń sportshylary laıyqty óner kórsete aldy», - delingen taratylǵan aqparatta.
Sonymen qatar basqarma málimetinshe, aqmolalyq Aleksandr Savın semserlesýden Qazaqstan chempıony atansa, Elnur Tólegenov qola medal ıelengen.
Elnur Tólegenovtiń aıtýynsha, barlyq qarsylastar joǵary deńgeıde semserlesken.
«Árbir jekpe-jek ońaı bolǵan joq. Jeńiske jetý úshin biraz kúsh jumsaýǵa týra keldi. Ókinishke oraı, qarsylasyma laıyqty tótep bere almadym. Ol menen kúshti ári jyldam boldy. Endi qarymta jekpe-jekke daıyndalatyn bolamyn. Kelesi jarysta munan da jaqsy óner kórsetemin dep oılaımyn», - dedi E.Tólegenov.
