Aqmolalyq polıtseıler «Questra Holdings» qarjy pıramıdasynan saq bolýǵa shaqyrdy
ASTANA. QazAqparat - Qazirgi tańda óńir aýmaǵynda aqmolalyqtardy pıramıda qyzmetine tartý faktileri tirkelgen joq. Sondyqtan, tártip saqshylary azamattardyń qyraǵy bolýyn suraıdy.
Polıtseılerdiń aqparaty boıynsha, «Questra Holdings Inc.» qarjy pıramıdasynyń qyzmeti bıyl Qazaqstannyń kóptegen oblystarynda tirkelgen, qazir úsh fakti boıynsha sotqa deıingi tergeý jumystary júrgizilip jatyr.
Polıtseıler atap ótkendeı, qarjy pıramıdasynyń ókilderi nemese alaıaqtar azamattarǵa túrli tabysy bar birneshe paket usynyp, paıda túsetini jaıly jalǵan ýáde berip aldaıdy. Qarjy pıramıdasynyń uıymdastyrýshylary men ókilderi alynǵan qarjylardyń ary qaraı qaıda túsetinin naqty túsindire almaıdy. Sonymen qatar, salymshylardyń qarjy pıramıdasyna birneshe adam kirgizýin usynyp, qosymsha tabys berýge ýáde etedi. Klıentterdiń sanyn arttyrý maqsatynda olar túrli semınarlar, prezentatsııalar ótkizip, jarnamalyq býkletter daıyndaıdy, keıin olardy qoǵamdyq oryndarda taratady nemese áleýmettik jeliler men messendjerlerdi qoldanady.
Munyń bári qarjy pıramıdasynyń belgileri jáne Qazaqstanda onyń qyzmetine Zańmen tyıym salynǵan.
