Aqmolalyq polıtseıler qoıan-qoltyq urys týrnırinde jeńimpaz atandy
KÓKShETAÝ. QazAqparat - Kókshetaýda Qazaqstan polıtsııasynyń 25 jyldyǵyna oraı qoıan-qoltyq urys jáne karate-do sportynan oblystyq ІІD basshysynyń kýbogine arnalǵan týrnır ótti, dep habarlaıdy «QazAqparat» HAA tilshisi.
Oblystyq ІІD, «Dınamo» sport qoǵamy federatsııasy jáne karate-do federatsııasynyń uıymdastyrýmen ótken týrnır barysynda ІІD, mamandandyrylǵan kúzet qyzmeti basqarmasy, qylmystyq atqarý júıesi departamenti qyzmetkerleri, 5510 áskerı bólim sarbazdary jáne jergilikti karteshilerden quralǵan 170 jýyq adam qatysyp, baq synady.
Týrnır 55 kg, 60 kg, 65 kg, 70 kg, 75 kg, 80 kg, 85 kg jáne 90 kg salmaqtar boıynsha ótti. Jarystyń ashylý saltanatynda oblystyq ishki ister departamenti bastyǵynyń orynbasary Janatbek Esimov quttyqtaý sóz sóılep, týrnırdiń mańyzdylyǵyn atap ótti.
«Quqyq qorǵaý organdary arasynda sportty damytýǵa zor kóńil bólinýde. Bizdiń qyzmetkerlerdiń kópshiligi baıraqty dodalarda oblys namysyn qorǵap júrgen sonyń aıǵaǵy ispettes», - dedi Janatbek Esimov.
Budan soń, týrnırdegi qoıan-qoltyq urys sportynyń bas tóreshi Jaslan Jantasov jarystyń erejelerin túsindirip ótti. Keshtiń qurmetti qonaqtary bolyp Qazaqstan Respýblıkasynyń qoıan-qoltyq urystan eńbek sińirgen jattyqtyrýshysy Mereke Júsipov, bokstan álem kýbogynyń ıegeri Rýslan Mýsınov jáne karate-do sportynan elimizdiń eńbek sińirgen jattyqtyrýshysy Sáken Raqymjanov boldy.
Jarys qorytyndysy boıynsha qoıan-qoltyq urystan Aqmola oblysynyń ishki ister departamentiniń sportshylary jeńis tuǵyrynan kórindi. Ekinshi orynǵa «Dınamo» sport klýbynyń sportshylary laıyq dep tanylsa, úshinshi oryn mamandandyrylǵan kúzet qyzmeti basqarmasynyń komandasyna buıyrdy. Al, karate-dodan jeńis tuǵyrynan kóringen Leıla Merzaeva, Ernur Erǵalıev, Serik Saıyn jáne Ánýar Asanov sekildi birqatar jas sportshylar jarys barysynda sheberlikterimen tanyldy. Týrnırge belsendi qatysqan sportshylardyń barlyǵyna estelik syılyqtar men arnaıy dıplomdar tabys etildi.
