Aqmolalyq polıtseıler kópbalaly otbasylardy Naýryz meıramymen quttyqtady

KÓKShETAÝ. QazAqparat - Aqmolalyq polıtseıler qaıyrymdylyq aktsııasy sheńberinde kópbalaly 5 otbasynda bolyp, Naýryz meıramymen quttyqtady, dep habarlaıdy QazAqparat tilshisi PD baspasóz qyzmetine silteme jasap.

Vedomstvonyń málimeti boıynsha, bul joly Bulandy aýdandyq PB qyzmetkerleri bastamashylyq tanytty. Polıtseıler Ulystyń uly kúni-Naýryz meıramynda kómekke muqtaj bes otbasynda boldy.

«Atalmysh otbasylardyń áleýmettik- turmystyq jaǵdaıyn estı salysymen biz olarǵa qıyn kezde kómek qolyn sozýdy sheshtik», - deıdi polıtsııa kapıtany, ıývenaldy polıtsııa tobynyń ýchaskelik ınspektory Zaıra Ábilqaıyrova.

Qajetti qarajat jáne azyq-túlik satyp alǵan polıtseıler Makınsk qalasyndaǵy kópbalaly bes otbasyna bardy. Óz kezeginde atalmysh otbasy músheleri de qaıyrymdylyq kómek kórsetken polıtseılerge alǵystaryn bildirdi.

«Polıtseıler árqashanda kómekke kelýge daıyn turady. Polıtseıler tarapynan jıi uıymdastyrylyp otyratyn túrli qaıyrymdylyq aktsııalary sonyń anyq aıǵaǵy. Bul bir rettik shara emes, aldaǵy ýaqytta da muqtaj otbasylarǵa kómek kórsete beremiz. Barlyq azamattardy osyndaı qaıyrymdylyq sharalaryna belsene qatysýǵa shaqyramyz», - dep atap ótti vedomstvodan.

Aıta ketý kerek, budan bólek Aqmola oblysynyń PD qyzmetkerleri Sandyqtaý aýdanyndaǵy balalar úıinde bolyp, ata-ananyń qamqorlyǵynsyz qalǵan jetim balalarǵa syılyqtar úlestirip, qaıyrymdylyq kontsertin ótkizdi. Qazirgi tańda Sandyqtaý aýdanyndaǵy balalar úıinde 60-tan astam bala tárbıelenýde. Tárbıelenýshilerge barlyq jaǵdaı jasalǵan.