Aqmolalyq polıtseıler kóligimen qarǵa batyp qalǵan balyqshyny qutqardy
KÓKShETAÝ. QazAqparat – Aqmola oblysynda tártip saqshylary qarǵa batyp qalǵan astanalyq 36 jastaǵy balyqshyny qutqardy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Er adamnyń sózinshe, kúnniń aıaz bolǵanyna qaramastan ol Qorǵaljyn aýdanynyń Sabyndy aýyly mańynda Nura ózenine balyq aýlaýǵa barǵan. Keıin úıge qaıtarda onyń kóligi qarǵa batyp qalǵan. Sol mańda bolǵan ózge balyqshylar oǵan kómektesýge tyrysqanynmen odan esh nátıje shyqpady. Sol kezde, ol «102» arnaıy jelisi boıynsha habarlasyp, kómek surady.
«Polıtsııa kapıtandary Beısenbaı Hamıtjanov pen Ádilbek Boranbaev birden aıtylǵan jerge jetti. Er adam tártip saqshylaryna basy aýyryp turǵanyn aıtqan. Anyqtalǵandaı, ol bir táýlik boıy kóliktiń ishinde otyrǵan. Balyqshy kópirge shyǵyp, jolaı ótip bara jatqan júrgizýshilerden kómek suraýǵa árekettengen. Alaıda, onyń bul árketinen eshteńe shyqpaǵan», - deıdi vedomstvodan.
Tártip saqshylary kólikti qar qursaýynan bosatyp, trassaǵa shyǵaryp saldy. Óz kezeginde er adam ózine kómektesken polıtsııa qyzmetkerlerine alǵysyn bildirdi.
