Aqmolalyq polıtseıler ishimdikke salynǵan 40-tan astam adamdy em qabyldaýǵa jiberdi
KÓKShETAÝ. QazAqparat - Aqmola oblysynyń polıtseıleri alkogolızmmen aýyratyn 40-tan astam naýqasty májbúrli túrde em qabyldaýǵa jiberdi, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimeti boıynsha, tájirıbe kórsetkendeı qylmystardyń kóbi alkogoldik mas kúıinde nemese spırttik ishimdik ishý kezinde bolady.
«Osyǵan baılanysty alkogolge áýes azamattardy ýaqytsha qoǵamnan oqshaýlaý sharasy qoldanylýda. Jeke tárbıeleýge kónbeıtinder oblystyń emdeý-aldyn alý mekemelerine májbúrli túrde emdeýge jiberiledi», deıdi vedomstvo ókilderi.
Polıtsııa ýchaskelik ınspektorynyń materıaly boıynsha Ereımentaý aýdanynyń Sileti aýylyndaǵy emdeý-aldyn alý mekemesine 2019 jyldyń basynan beri barlyǵy 40-tan astam alkogolızmmen aýyratyn naýqas májbúrli túrde em qabyldaýǵa jiberilip otyr.
«Qazirgi kezde quqyq buzýshylardy ýaqytsha oqshaýlaý boıynsha oblysta osyndaı 2 mekeme (Ýaqytsha beıimdeý jáne ońaltý ortalyǵy) jumys isteıdi. Onyń biri Kókshetaý qalasyndaǵy 18 oryndyq mekeme bolsa, ekinshisi Stepnogor qalasyndaǵy 10 adamǵa laıyqtalǵan oryn», dep tolyqtyrdy vedomstvodaǵylar.
Aıta keteıik, polıtsııanyń ýchaskelik ınspektorlary turaqty túrde alkogoldik sýsyndar tutynylatyn oryndarynda aldyn alý sharalaryn ótkizip turady.
