Aqmolalyq polıtseı naýqas balany aýrýhanaǵa jedel jetkizýge kómektesti
KÓKShETAÝ. QazAqparat - Aqmolalyq polıtseı naýqas balany aýrýhanaǵa jedel jetkizýge kómektesti, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, qazannyń 7-sinde keshki saǵat 20:30 shamasynda Zerendi aýdandyq PB jergilikti polıtsııa qyzmeti bóliminiń bastyǵy polıtsııa maıory Dáýlethan Mataev «Ýchastok» jedel aldyn alý is-sharasy aıasynda tirek pýnktteriniń jumysyn tekserdi. Ol «Atbasar-Kókshetaý» avtojolynyń 28 shaqyrymynda oblystyq ortalyǵyna baǵyty boıynsha polıtseı joldyń shetinde isten shyqqan «Gazel» kóligin kórip, júrgizýshiden máni-jaıdy suraıdy. Júrgizýshisi 10 aılyq balany jedel aýrýhanaǵa apara jatqanyn jáne kóliktiń isten shyqqanyn aıtyp, kómek suraıdy.
Anyqtalǵandaı, sábı oıynshyqtyń magnıtin jutyp qoıǵan. Tynys alýy qıyndaǵan soń ata-anasy óz kúshimen aýrýhanaǵa jetkizbekshi bolǵan. Alaıda, jolda kólikten aqaý shyǵyp, jarty jolda toqtaǵan.
«Polıtsııa qyzmetkeri dereý balany anasymen birge qyzmettik kóligimen 15 mınýttyń ishinde oblystyq balalar aýrýhanasyna jetkizdi. Náreste jaǵdaıy jaqsarǵanǵa deıin reanımatsııada 4 saǵat ótkizip, jalpy palataǵa aýystyryldy. Qazirgi ýaqytta polıtsııa qyzmetkeriniń jedel áreketteriniń arqasynda qyzdyń ómiri men densaýlyǵyna eshqandaı qaýip tónip turǵan joq , - dedi vedomstvodan.
Óz kezeginde, sábıdiń ata-anasy qajet ýaqytta kómek kórsetken polıtsııa qyzmetkerine alǵysyn bildirdi.
