Aqmolalyq pishenshiler 1,2 mln tonnaǵa jýyq shóp daıyndady

KÓKShETAÝ. QazAqparat - Aqmolalyq pishenshiler 1,2 mln tonnaǵa jýyq shóp daıyndady. Bul –qolda bar mal úshin qajetti bir jyldyq jemshóp qorynyń 86,7 paıyzy. Bul týraly Aqmola oblystyq Aýyl sharýashylyǵy jáne jer qatynastary basqarmasy basshysynyń orynbasary Erkesh Álenov málim etti, dep habarlaıdy QazAqparat tilshisi.

Basqarma basshysy orynbasarynyń aıtýynsha, qazirgi kezde shóp shabý jumystary qyzý júrip jatyr. Malǵa qajetti jemshópti jınaýda aqmolalyq pishenshiler belsendilik tanytýda.

«Bıyl oblys boıynsha sharýalar shamamen 458 myń iri qara, 250 myń jylqy, 569 myń qoı, 40 myń eshkini qystatqaly otyr. Osynaý malǵa 1 mıllıon 308 myń tonna mal azyǵy qajet.

Kóktemnen beri jaýyn-shashyn bolmaǵandyqtan, shabyndyqtaǵy shóp óspeı qaldy. Degenmen, jemshóppen tolyq qamtamasyz etý maqsatynda mal azyǵy ósiriletin alqap 28 myń gektarǵa ulǵaıtyldy, ol jalpy alǵanda 223 myńnan astam gektardy qurady. Búgingi tańda pishenshiler 1,2 mln tonnaǵa jýyq shóp daıyndady. Bul –qolda bar mal úshin qajetti bir jyldyq jemshóp qorynyń 86,7 paıyzy.

Budan bólek, 107,8 myń tonna pishendeme jáne 13 myń tonna súrlem daıyndaldy. Sonymen birge oblysta sharýashylyqtardy jemmen tolyq qamtamasyz etý qajettigin eskere otyryp, qosymsha taǵy 750 myń tonna saban daıyndaý josparlanyp otyr. Osy baǵyttaǵy jumys jalǵasyp keledi», - dep túsindirdi Erkesh Álenov QazAqparat tilshisiniń saýalyna.

Aıta ketsek, budan buryn Aqmola oblysynda kúzgi egin oraǵyna 7 myńǵa jýyq kombaın paıdalanylatynyn jazǵan edik.