Aqmolalyq palýan Máskeýdegi týrıstik kórmede Qazaqstandy tanystyrady
KÓKShETAÝ. QazAqparat - Aqmolalyq palýan Sergeı Tsyrýlnıkov Máskeýde ótip jatqan týrıstik kórmede Qazaqstandy tanystyrady. Alyp kúsh ıesi kórmedegi qoıylymy arqyly óńirge týrıst tartýdy kózdep otyr, dep habarlaıdy QazAqparat tilshisi.
Aqmola oblysy týrızm basqarmasynyń málimetinshe, naýryzdyń 12-14 aralyǵynda MITT-2019 Máskeý halyqaralyq «Saıahat jáne týrızm» týrıstik kórmesi ótýde. MITT-2019 kórmesi álemdegi eń iri týrıstik kórmelerdiń biri sanalady jáne árqashan halyqaralyq qoǵamdastyq tarapynan joǵary baǵalanady. Kórmege jyl saıyn álemniń 190-nan astam eli men óńirinen 2000 jýyq kompanııa qatysady.
«Kórmede Qazaqstan tarapynan jalpy aýmaǵy 69 sharshy metr jeke kórme stendi usynyldy. Jerlesterimiz Qyrǵyzstan jáne Ózbekstan eliniń stendterimen qatar ornalasty, ıaǵnı biryńǵaı shyǵys stılin saqtaý maqsatynda. Bul kórmeniń resmı seriktesi, QR Mádenıet jáne sport mınıstrligi jáne «Kazakh Tourism» UK AQ-men birlesip, týrıstik ındýstrııa men týrızm bıznesi ókilderine arnalǵan qarajat bóldi. Eksponentterge arnalǵan alǵyshart - joǵary sapaly taratylymdar men qalyptasqan týrıstik ónimniń bolýy», - dep atap ótti Aqmola oblysy týrızm basqarmasyndaǵylar.
Sonymen qatar, kórme sheńberinde aqmolalyq tanymal palýan Sergeı Tsyrýlnıkov Qazaqstan men Aqmola oblysynyń atynan óner kórsetip, erekshe áserli shoý usynbaqshy.
Aqmola oblysy ákiminiń orynbasary Marat Iǵalıevtiń sózinshe, Sergeı Tsyrýlnıkovtyń kórmege qatysýy - kelýshiler nazaryn Qazaqstannyń stendine aýdarýǵa jáne eldiń týrıstik ımıdjin nyǵaıtýǵa múmkindik beredi.
«Aqmola oblysy - reseılikter jıi demalatyn oryndardyń biri. Sondyqtan, bul kórmeniń mańyzy zor. Kórme arqyly eki eldiń shekaralas aımaqtary arasynda týrıstik baılanys nyǵaıa túsedi. Óz kezeginde aqmolalyqtar óńirdiń týrıstik áleýeti týraly aqparattyq materıaldardy usynady. Al, Sergeı Tsyrýlnıkov bolsa, kórmede bizdiń oblysty jarnamalaıdy. Bul Býrabaı kýrortyna týrıster aǵymyn arttyrýǵa múmkindik bermek», - dedi QazAqparat tilshisine M.Iǵalıev.
Kórme sheńberinde Aqmola oblysynyń delegatsııasy otandyq jáne halyqaralyq naryqtardaǵy týrızm ındýstrııasynyń ókilderimen kezdesýler men kelissózder júrgizedi.
Aıta keteıik, Sergeı Tsyrýlnıkov - Aqmola oblysy Shortandy aýdanynyń týmasy. Kúsh óneri boıynsha 4 dúrkin álemdik rekordshy, voleıbol jáne paýerlıftıng boıynsha sport sheberi, kir tasyn kóterý boıynsha sport sheberine úmitker, qazaqtyń ataqty balýany Qajymuqan men Balýan Sholaqtyń dástúrin jalǵastyratyn birqatar qaýipti, kúrdeli trıýkterdi oryndaýshy. Qazaqstan Respýblıkasy Memlekettik Gvardııasynyń burynǵy ofıtseri. 2017 jyly ol ártúrli baǵyttarda tórt adam tartyp turǵan attardy kóterý arqyly óte qaýipti trıýk kórsetken bolatyn. Osy qoıylym arqyly ol Qazaqstannyń rekordtar kitabyna engen. 2018 jyly ol salmaǵy 148 tonnalyq mashına bar dızeldi teplovozdy birneshe metrge súıregen bolatyn.
