Aqmolalyq órt sóndirýshi qyz álem chempıonatynda júldeger atandy
KÓKShETAÝ. QazAqparat - Aqmolalyq órt sóndirýshi qyz Anastasııa Astafeva órt-qutqarý sportynan álem chempıonatynda kúmis júldeger atandy, dep habarlaıdy QazAqparat tilshisi.
Oblystyq tótenshe jaǵdaıdalar departamentiniń málimetinshe, Reseıdiń Saratov qalasynda ótken baıraqty jarysqa álemniń 30-dan astam elinen órt sóndirýshiler qatysyp, baq synady. Onyń ishinde Qazaqstan quramasy sapynda erler men áıelder jáne jasóspirimder komandasy óner kórsetti.
«Ulttyq qurama sapynda bolǵan aqmolalyq azamattyq qorǵanys qyzmetiniń kishi serjanty, mamandandyrylǵan órt sóndirý bóliminiń radıotelefonısi Anastasııa Astafeva «áskerı órbitý» tártibi boıynsha kúmis júldeger atandy. Anastasııanyń jeńisi jalpy komandalyq esepte Qazaqstan áıelder quramasynyń júldeli ekinshi orynnan kórinýine septigi tıgizdi», deıdi vedomstvodan.
Aıta keteıik, Anastasııa Qazaqstan Respýblıkasynyń ulttyq quramy sapynda osymen úshinshi ret álem chempıonatyna qatysyp otyr. Bıylǵy aqpan aıynda shabýyl baspaldaǵymen kóterilýde Qazaqstan rekordyn ornatty.
