Aqmolalyq órt sóndirýshi Kókshetaýda gaz jarylǵan páterge birinshi bolyp kómekke kelgen

KÓKShETAÝ. QazAqparat - Aqmola oblystyq TJD qyzmetkeri Jarqyn Shaıahımov Kókshetaýda gaz qoparylǵan páterge birinshi bolyp kómekke kelgen. Er adamnyń órtti qalaı sóndirgeni jáne onyń paıda bolý sebepteri týraly oblystyq TJD baspasóz qyzmeti málim etti, dep habarlaıdy QazAqparat tilshisi.

Vedomstvonyń málimetinshe, qazannyń 12-de Kókshetaý qalasy Kóktem shaǵynaýdany 5a meken-jaıy boıynsha ornalasqan bes qabatty turǵyn úıdiń ekinshi qabatyndaǵy páterde gaz-aýa qospasy jaryldy. Bul osy úıde turǵyny Aqmola oblysy TJD qyzmetkeri Jarqyn Shaıahımovtyń jumysynan úıine qaıtqan kezi.

«Ol osy úıdiń joǵary qabatyndaǵy páterine kirip, syrt kıimin sheship te úlgermedi. Kenet qatty jarylystyń daýysy estildi. Osy kezde onyń 18 jastaǵy qyzy Ásem ákesine gaz jarylǵan aıtyp, «101» nómirine qońyraý shaldy. Al, ákesi Jarqyn Qýandyquly bolsa, birden páterindegi gazdyń kranyn jaýyp, jarylys bolǵan tómengi qabatqa júgiredi. Onda qyzyl jalynǵa shelekpen sý búrkip, turǵyndardy evakýatsııalaýdy uıymdastyrdy. Birinshi kezekte, balalar men áıelderdi, sodan soń ózgelerdiń qaýipsiz jerge shyǵýyna kómektesti. Artynsha, úı jıhazy men terezedegi perdelerdi sharpyǵan otty sóndirýge umtylady. Alaıda, qyzyl jalyn oǵan des bermeıdi. Biraq ta, ol soǵan qaramastan as bólmedegi shkfatyń tómengi jaǵynda turǵan gaz ballonyn redýktorynan ajyratyp, syrtqa alyp shyǵady», - dedi vedomstvodan.

Anyqtalǵandaı, atalmysh páterge ortalyqtandyrylǵan gaz da tartylǵan. Úıde bes kún boıy ortalyqtandyrylǵan gaz bolmaı, sol jarylys bolatyn kúni ǵana berilipti. Jarqyn Shaıahımov bul páterdegi gaz kranyn da jabady. Aqyry turǵyndarmen birge tilsiz jaýmen arpalysyp júrip ony aýyzdyqtaıdy. Osy kezde shaqyrý boıynsha órt sóndirý brıgdasy da keledi. Olarǵa Jarqyn mán-jaıdy túsindiredi.

Jarqyn Shaıahımov organdarda 2000 jyldyń 3 sáýirinen bastap qyzmet atqarady. Qyzmetin prokýratýrada bastap, 2005 jyldyń qyrkúıegine deıin jumys istedi. Osy jyldyń kúzinen bastap azamattyq qorǵaý organdarynda, 2020 jyldyń 30 sáýirinen bastap qazirgi ýaqytqa deıin Aqmola oblysy TJD «Órt sóndirý jáne apatty qutqarý jumystary qyzmeti» memlekettik mekemesiniń jedel kezekshi laýazymynda qyzmetin jalǵastyrdy. Úılengen, tórt qyz tárbıelep otyr.

Áriptesteriniń sózinshe, Jarqyn Qýandyquly 17 jyldan qan tapsyrýda donor bolyp keledi.

Eske sala ketsek, keshe Kókshetaý qalasynyń Kóktem shaǵyn aýdanyndaǵy bes qabatty turǵyn úıde gaz jaryldy. Odan eki adam zardap shekti.