Aqmolalyq oqýshylar polıtsııa qyzmeti týraly ǵylymı jobalaryn tanystyrdy

KÓKShETAÝ. QazAqparat –Aqmola oblysynda Qazaqstan halqy Assambleıasynyń qoldaýymen Polıtsııa departamenti ótkizgen mektep oqýshylary arasyndaǵy shyǵarmashylyq jáne ǵylymı jobalar baıqaýynyń jeńimpazdary marapattaldy. Konkýrs QR Tuńǵysh Prezıdenti kúnine oraı uıymdastyryldy, dep habarlaıdy QazAqparat tilshisi.

Oblystyq Polıtsııa departamenti baspasóz qyzmetiniń málimetinshe, óskeleń urpaqty tárbıeleý, azamattyq prıntsıp jáne patrıotızmdi qalyptastyrý arqyly bilim jáne tárbıeni sińirý maqsatynda uıymdastyrylǵan baıqaýǵa mektep oqýshylary asa yjdahattylyqpen qatysty. Baıqaý jeńimpazdary «Polıtsııa – memlekettik qyzmettiń erekshe túri», «Polıtsııanyń úzdik batyrlary», «ІІB ardagerleri tártip kúzetinde» sekildi úsh atalym boıynsha anyqtaldy.

«Oqýshylar óz ǵylymı jobalaryn daıyndaý barysynda ishki ister organdarynyń qyzmetin zerttep, qyrýar jumys atqardy. Olar vıdeorolık jáne slaıd arqyly polıtsııa qyzmetkerleriniń kúndelikti jumysyn kórsetip, tártip saqshylarynyń mindetteri týraly aıtty», - deıdi vedomstvo baspasóz qyzmetiniń jetekshisi Gúlnar Pınchýk.

Baıqaýǵa shyǵarmashylyq jáne ǵylymı jobalar boıynsha 20 jumys usynyldy.

Konkýrsqa Qazaqstan halqy Aqmola oblystyq Assambleıasy jáne Assambleıa janyndaǵy volonterler ortalyǵynyń jetekshisi Ýmar Shonozorov, Kókshetaý tehnıkalyq lıtseıiniń qazaq tili men ádebıeti pániniń muǵalimi Irına Hohlova tórelik etti. Sonymen birge, Aqmola oblystyq ishki saıasat basqarmasy janyndaǵy «Qoǵamdyq kelisimniń» taldaý jáne monıtorıng bóliminiń basshysy Svetlana Egıkıan, Aqmola oblystyq PD kadr saıasaty basqarmasynyń bastyǵy Elkebek Áýbákirov baıqaý jumystaryn baǵalady.

Pandemııaǵa baılanysty jeńimpazdardy marapattaý rásimi Zoom arqyly ótti.

Baıqaý qorytyndysy boıynsha «Polıtsııanyń úzdik batyrlary» atalymynda Kókshetaý tehnıkalyq lıtseıiniń 5 «b» synybynyń oqýshylary jeńimpaz atansa, ekinshi oryndy Şýche qalasyndaǵy №.7 mektep lıtseıiniń oqýshysy Murat Aılana, úshin oryndy Atbasar qalasyndaǵy №1 orta mekteptiń oqýshysy Azız Káribaev ıelendi.

«Polıtsııa - memlekettik qyzmettiń erekshe túri» atalymy boıynsha Şýche qalasyndaǵy Q.Sátbaev atyndaǵy orta mekteptiń oqýshysy Aıym Saýytova jeńimpaz bolsa, ekinshi orynǵa Kókshetaý qalalyq №6 orta mekteptiń 5 oqýshysy Adam Nogaev pen Şýche qalasyndaǵy №2 orta mekteptiń oqýshysy Imana Tsechoeva laıyq dep tanyldy.

Úshinshi oryn eki oqýshyǵa – Jaqsy aýylyndaǵy №1 orta mektepten Baǵdat Jetpispaıǵa jáne Kókshetaý qalasyndaǵy M.Ǵabdýllın atyndaǵy №3 gımnazııadan Dastan Serikovke buıyrdy.

«ІІB ardagerleri tártip kúzetinde» atalymynda Balkashın aýylyndaǵy №2 orta mekteptiń oqýshysy Danııa Egorov jeńimpaz atandy. Ekinshi orynnan oblys ortalyǵyndaǵy №13 mektep gımnazııasynyń oqýshysy Islamııa Esenbekova kórindi.

Jalpy, baıqaýǵa qatysqan birde bir oqýshy eskerýsiz qalǵan joq, barlyǵy arnaıy dıplom jáne gramotalarmen marapattaldy.