Aqmolalyq oqýshylar Elbasynyń eńbekteri boıynsha Qazaqstan tarıhyn zerttedi
Atalmysh shara Qazaqstan Respýblıkasy Táýelsizdiginiń 30 jyldyǵyna oraı ótkizildi, dep habarlaıdy QazAqparat tilshisi.
Sharaǵa Aqmola oblysy jalpy bilim beretin mektepteriniń 9-11 synyp oqýshylary qatysty.
Atalmysh is-sharanyń maqsaty – Qazaqstan Respýblıkasynyń Tuńǵysh Prezıdenti – Ult kóshbasshysy N.Á. Nazarbaevtyń eńbekterindegi mańyzdy ıdeıalary men ıgi bastamalaryn, strategııalyq qujattaryn zertteý jáne baǵalaý.
Baıqaýda Qorǵaljyn, Atbasar, Zerendi aýdandarynyń, Kókshetaý, Stepnogor qalalarynyń oqýshylary belsendilik tanytty.
Qatysýshylar QR Tuńǵysh Prezıdenti N.Á.Nazarbaevtyń jumystary boıynsha usynylǵan baǵyttardyń birin tańdap, qazaq nemese orys tilinde jazylǵan ózderiniń baıandamalaryn usyndy. Jumystar Jalpyǵa Ortaq Eńbek Qoǵamy ıdeıasynyń iske asyrylýy, Táýelsizdik – Qazaq memlekettiliginiń qaıta jańǵyrýy: Qazaqstannyń joly – evolıýtsııalyq damý, Indýstrıaldy-ınnovatsııalyq ekonomıkany qurý: jetistikteri men bolashaǵy, Táýelsiz Qazaqstannyń mádenı jetistikteri (bilim, ǵylym, óner, rýhanı damý, ulttyq quńdylyqtar), Adam kapıtaly – eńbasty ulttyq resýrs atty baǵyttardy qamtydy.
Konferentsııa 2 kezeńnen turdy. Birinshi kezeńde 24 jumys qabyldanyp, jeteýi aqtyq synǵa iriktelip alyndy. Úzdik jumystar onlaın formatta tyńdalyp, jeńimpazdarǵa dıplomdar men alǵys hattar tapsyryldy.
Onyń ishinde Zerendi aýdany, Zerendi aýylynyń №1 jalpy orta bilim beretin mektebiniń oqýshysy Narıman Qoshaev Bas júldeni jeńip aldy. Al Kókshetaý qalalyq №1 mektep-gımnazııasynyń oqýshysy Aınázik Aqmatova 1 orynǵa ıe boldy. Qorǵaljyn aýyly mektep-gımnazııasynyń namysyn qorǵaǵan Ádına Qundaqbaeva men Atbasar №2 jalpy orta bilim beretin mektebiniń oqýshysy Juldyz Júnisova 2 orynǵa turaqtady. Al, Atbasar aýdany, Sepe aýylynyń jalpy bilim beretin mektebiniń oqýshysy Jaına Noıan, №13 mektep-gımnazııasynyń oqýshysy Mılana Karıpollaeva jáne Stepnogordegi Abaı Qunanbaev atyndaǵy №6 mektep-gımnazııasynyń oqýshysy Tımýr Sholko 3 oryndy ózara bólisti.
