Aqmolalyq oqýshy qyz túnde astananyń oıyn klýbynan tabyldy
Oqýshy qyz Nur-Sultan qalasyndaǵy oıyn klýbynan tabylǵan. Elordalyq ıývenaldy polıtsııa qyzmetkerleri «Abaılańyz – balalar!» jedel aldyn alý sharasy aıasynda reıd ótkizgen.
«8 qyrkúıek kúni saǵat 23.30-da «Barclays Premier Ltaque» oıyn klýbynan týǵan-týystaryna qonaqqa kelgen Aqmola oblysynyń turǵyny – 14 jastaǵy oqýshy qyz tabyldy. Qyzdarynyń jaýapsyz áreketi saldarynan ata-anasyna tún úshinde elordaǵa jetýine týra keldi. Jasóspirim túngi ýaqytta eresekterdiń qaraýynsyz kóńil kóterý ornynda júrgeni úshin anasyna qatysty QR Ákimshilik quqyq buzýshylyq týraly kodekstiń 442-baby 1-bóligi boıynsha ákimshilik hattama toltyryldy. Sonymen qatar oqýshy qyzben mundaı faktilerge aldaǵy ýaqytta jol bermeý týraly túsindirý jumysy júrgizildi», - dedi Nur-Sultan qalalyq Polıtsııa departamentinen.
Departament málimetinshe, oıyn klýbynyń ákimshiligine qatysty QR Ákimshilik quqyq buzýshylyq týraly kodekstiń 132-babymen is qozǵaldy. Bul bapta quqyq buzýshyǵa 10 aılyq eseptik kórsetkish (1 AEK – 2778 teńge) kóleminde aıyppul salý kózdelgen.
Aıta keterligi, «Abaılańyz – balalar!» jedel aldyn alý sharasy bastalǵannan beri qaladaǵy kompıýterlik klýbtarda zań buzýshylyqtyń 3 faktisi anyqtalyp, oıynǵa elitken 6 bala ustaldy. Olardyń ata-analary ákimshilik jaýapqa tartyldy.
Osyǵan oraı Nur-Sultan qalalyq Polıtsııa departamenti ata-analarǵa balalaryn túngi ýaqytta qaraýsyz jibergeni úshin jaýapkershilik bar ekendigin eskertedi.
