Aqmolalyq meshitten sadaqa jáshigin urlamaq bolǵan
KÓKShETAÝ. QazAqparat – Aqmola oblysynda meshitten sadaqaǵa arnalǵan jáshikti urlap áketpekshi bolǵan kúdikti anyqtaldy, dep habarlaıdy QazAqparat tilshisi oblystyq Polıtsııa departamentiniń baspasóz qyzmetine silteme jasap.
Vedomstvonyń málimetinshe, 25 sáýirde Shortandy aýdandyq PB kezekshilik bólimine jergilikti turǵyn habarlasyp, belgisiz bireýdiń meshit ǵımaratynyn sadaqa jáshigin urlamaqshy bolǵanyn aıtty.
«Oqıǵa ornyna jetken tártip saqshylary urynyń meshittiń terezesin buzyp ishine túskenin anyqtady. Polıtsııa qyzmetkerleri meshitte jáne sol mańdaǵy beınebaqylaý kameralaryndaǵy jazbany zertteı kele, kúdikti anyqtady. Ol Shortandy kentiniń 44 jastaǵy turǵyny bolyp shyqty», - dedi vedomstvodan.
Anyqtalǵandaı, er adam sadaqa jáshiginiń qulybyn buza almaı, tastap ketip qalǵan.
«Qazirgi kezde osyǵan baılanysty «urlyqqa oqtalý» boıynsha qylmystyq is qozǵalyp, sotqa deıingi tergeý amaldary júrgizilýde. Kúdiktige «shaqyrǵanda kelý mindettemesi» protsessýaldyq sharasy qoldanyldy», - dep tolyqtyrdy vedomstvodan.
