Aqmolalyq maıdangerlerge «Máskeý úshin shaıqastyń 75 jyldyǵyna» medali tapsyryldy
UOS jyldary Máskeý úshin shaıqasqa qazaqstandyq ataqty 8-shi atqyshtar dıvızııasynyń qatysqany tarıhtan belgili. Panfılovshylar dıvızııasy atalyp ketken qazaqstandyqtardan quralǵan qurama jankeshti erliktiń úlgisin kórsetip, uly jeńiske aıtýly úlesin qosqan edi. Mine, sol panfılovshylar dıvızııasynyń quramynda Moskvany jaýdan qorǵaýǵa qatysqan 6 kókshetaýlyq jaýyngerdiń búginde tórteýiniń kózi tiri eken.
Ardagerler keńesinde ótken sharaǵa 92-ge tolǵan maıdanger Aıdarhan Báıken aqsaqal ǵana keldi. Reseı Federatsııasynyń Qazaqstandaǵy elshiliginiń keńesshisi Aleksandr Mýsıenko medalmen birge maıdangerge prezıdent Vladımır Pýtınniń hatyn da qosa tapsyrdy. El taǵdyry tarazyǵa túsken sol aýyr shaqta jan aıamaı shaıqasyp, Máskeýdi jaýdan qorǵap qalǵan qazaqstandyq qaharmandarǵa alǵysyn bildirgen prezıdent hatyn elshilik keńesshisi oqyp berdi. Óz kezeginde ardager de osyndaı qurmet kórsetkeni úshin Pýtınge jáne Reseı halqyna rızashylyǵyn jetkizip, búgingi qol jetken eń úlken jetistigimiz - beıbitshiligimiz máńgilik bolsyn degen tilegin bildirdi.
Qalalyq ardagerler keńesiniń janynan qurylǵan ardagerler ansambli maıdan ánderin aıtyp, alysta qalǵan otty jyldardy eske salǵandaı boldy. Ókinishke oraı, mereıtoılyq medalmen marapattalǵan maıdanger Turabaı Erejepov pen Ivan Pshenıchnyı bul kúnge jete almapty. Medaldi elshilik keńesshisi ardagerlerdiń týystaryna tabys etti. Al, densaýlyqtaryna baılanysty kele almaǵan maıdangerler Shamıl Magavın, Leonıd Sınelnıkov jáne Ignatıı Shaposhnıkovke Astanadan arnaıy kelgen elshilik keńesshisi úılerine baryp medaldi óz qolymen tabystady.
