Aqmolalyq qutqarýshylarǵa kómektesý úshin álemdegi eń úlken tikushaq jetkizildi
NUR-SULTAN. QazAqparat - Aqmola oblysy aýmaǵynda órt qaýpi bar kezeńniń bastalýyna baılanysty, sondaı-aq óńirdiń orman qoryn órtten qorǵaýdy qamtamasyz etý maqsatynda Almaty qalasynan aýyr, kóp maqsatty MI-26 kólik tikushaǵy ákelindi, dep habarlaıdy QazAqparat.
«MI-26 tikushaǵynyń kómegimen biz apat ornynan zardap shekkenderdi shuǵyl evakýatsııalaı alamyz. Sondaı-aq avtokólikti, arnaıy tehnıkany, medbrıgadany, janar-jaǵarmaıdy jetkizý, órt sóndirý, sonyń ishinde birshama tekshe metr sý jınaıtyn shtattyq aspaly qurylǵyny qoldaný arqyly órttiń úlken oshaqtaryn sóndiremiz» , - dedi Aqmola oblysy Tótenshe jaǵdaılar departamentiniń bastyǵy Alekseı Sovetov óńirlik ortalyq kommýnıkatsııalar qyzmetinde ótken brıfıng barysynda.
Eń kóp degende 3-4 tonna sý alatyn basqa tikushaqtarǵa qaraǵanda MI - 26 órt oshaǵyna 15 tonna sý tóge alatynyn aıta ketý kerek. Osylaısha, tikushaq borty segiz gektarǵa jýyq ýchaskede jumys isteıdi. Jaryq kúni órt shyqqan aýmaqqa 300 tonnaǵa deıin sý shashýy múmkin.
MI-26 ushyp kelip, Kókshetaý qalasyna qondy. Qajet kezde qutqarýshylar ushyp shyǵýǵa jáne zardap shekkenderge kómek kórsetýge nemese órtti sóndirýge daıyn. Aqmola qutqarýshylaryna tikushaqty Qazaqstan Respýblıkasy Tótenshe jaǵdaılar komıteti bergen.
Esterińizge sala keteıik, MI-26-álemdegi eń úlken serııalyq kólik tikushaǵy, onyń esebinde ondaǵan álemdik rekordtar men oryndalǵan standartty emes tapsyrmalar bar. Tikushaq tótenshe jaǵdaılardyń aldyn alý jáne joıýda tamasha qural retinde ózin kórsetti.
