Aqmolalyq qutqarýshylar jyljymaly sý sorý stansasyn synaqtan ótkizdi
KÓKShETAÝ. QazAqparat – Aqmola oblysynyń qutqarýshylary 2020 jylǵy kóktemgi sý tasqynyna daıyndyq kezinde jyljymaly sý sorý stansasyn synaqtan ótkizdi, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimetinshe, Kókshetaý qalasyndaǵy órt sóndirýshi-qutqarýshylar GAZ-66 jáne ZIL-131 kólikterine saǵatyna 1300 tekshe metrge deıin sý sorýǵa qýatty motopompany ornatqan. Laı sýdy sorýǵa arnalǵan bul jyljymaly stansanyń artyqshylyǵy qutqarýshylardyń jetýine qıyn jerlerge jedel qoldanýynda bolyp otyr.
«Qutqarýshylardyń jaıaý bara almaıtyn jerlerine GAZ-66 jáne ZIL-131 kólikterimen baryp, jedel sý sorýǵa bolady. Kólikke ornatylǵan motopompaǵa dıametrleri 125 jáne 150 mm shlangter tartylǵan. Osy arqyly saǵatyna 1300 tekshe metrge deıin sý sorýǵa bolady. Bul teńdessiz sý sorý stansasy kóktemgi sý taqyny kezeńine deıin óziniń tıimdiligin kórsetti. Qystygúni Kókshetaý qalasynda №2 kárizdik stansa isten shyǵyp, 40 myń abonent sýsyz qalǵan edi. Sol kezde qazylǵan shuńqyrǵa aǵyn sýdyń kelýi kommýnaldyq kásiporynnyń jumysshylaryna apatty joıýǵa kedergi keltirdi. Osy kezde GAZ-66 ornatylǵan jyljymaly sý sorý stansasy úsh táýlik boıy 25 myń tekshe metrden astam sý soryp, kommýnaldyq qyzmetterdiń qaýipsiz jumys isteýin qamtamasyz etti», - deıdi TJD bastyǵy Alekseı Sovetov.
Aıta keteıik, 2019 jyly QR ІІM TJK laı sý sorýǵa arnalǵan motopompanyń bes danasyn satyp alyp, Aqmola oblysynyń TJD tapsyrǵan bolatyn.
