Aqmolalyq qoıma meńgerýshisi kir tasyn kóterýden álem chempıony atandy
KÓKShETAÝ. QazAqparat - Aqmola oblysynda sharýa qojalyǵynda jumys isteıtin Merýert Súleımenova kir tasyn kóterýden Álem chempıonatynyń altyn medalin jeńip aldy, dep habarlaıdy QazAqparat tilshisi oblystyq dene shynyqtyrý jáne sport basqarmasynyń baspasóz qyzmetine silteme jasap.
Vedomstvonyń deregi boıynsha, baıraqty jarys Latvııanyń Daýgaýpıls qalasynda ótip jatyr. Jarysta álemniń 35 elinen jınalǵan 400 sportshy eresekter, jastar U-22 jáne ardagerler sanaty boıynsha kúsh synasýda.
«Qazaqstan ulttyq quramasy sapynda Aqmola oblysy atynan qatysqan 21 jastaǵy Merýert Súleımenova 63 keli salmaqtaǵylar arasynda 24 keli kir tasyn kóterip, álem chempıony atandy. Merýet Astrahan aýdanyndaǵy Jarsýat aýylyndaǵy sharýa qojalyǵynda qoıma meńgerýshisi bolyp jumys isteıdi», dep atap ótti vedomstvo.
Sonymen qatar, taǵy bir aqmolalyq Jarqaıyń aýdanynyń týmasy, 11-shi oqýshysy Denıs Dolgashov 63 keli salmaqta qossaıys boıynsha 135 upaı jınap, qola júldeger atandy.
Aıta keteıik, 2015 jyly Merýert Irlandııa astanasy Dýblın qalasynda ótken baıraqty jarysta da álem chempıony atanǵan bolatyn.
