Aqmolalyq qaıyrymdy jandar 3 aýylǵa modeldi kitaphanalar ashty

KÓKShETAÝ. QazAqparat - Aqmola oblysynda «Atameken» kishi baǵdarlamasy boıynsha jalpy quny 2,1 mıllıard teńgege 41 áleýmettik joba júzege asyryldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Atalymsh baǵdarlama boıynsha óńirde kásipkerlerdiń qoldaý-kómeginiń arqasynda jańa 11 áleýmettik nysan (1 týrıstik keshen, 1 mektep, 2 turǵyn úı,   3 balalar alańy, 4 stadıon) ashyldy. Olardyń qurylysy úshin 176,3 mıllıon teńge qarjy jumsaldy.

Naqtyraq aıtsaq, Tselınograd aýdanynda jalpy quny 485,4 mıllıon teńgege 7 joba júzege asyryldy. Onyń ishinde bıylǵy jyldyń naýryz aıyna Otaýtúsken aýylynda 50 oryndyq bastaýysh mektep (12 mıllıon teńgege) salyndy. Zelenyı Gaı aýylynda 101 teńgege mádenıet úı bar mádenı-saýyqtyrý kesheniniń ǵımaraty qalpyna keltirildi. Budan bólek, bıyl Aqmol aýylynda 280 oryndyq balabaqsha men eki jańa mekteptiń qurylysy josparlanǵan.

Sandyqtaý aýdanynda «Svobodnoe» JShS basshysy Aleksandr Zakýsılovtyń 575 mıllıon teńge jeke qarajaty esebinen 5 joba júzege asyryldy. Onyń ishinde Maksımovka aýylynda jas mamandar úshin eki páterli on úı salyndy. Mektep oqýshylaryn tasymaldaý úshin shaǵyn avtobýs satyp áperildi. Aýyl kósheleri men mektepke kúrdeli jóndeý jumystary júrgizildi. Jaqynda jańa hokkeı korty salyndy.

Stepnogorsk qalasynda 334,4 mıllıon teńge bolatyn 10 joba júzege asyryldy.

Shilde aıynda «Ómir» áleýmettik qoldaý ortalyǵy ashyldy.  Jerlesterimizdiń qoldaýynyń arqasynda aýdandar men qalalarda 11 sport alańy paıdalanýǵa berildi. Ýálıhan Áripov basqaratyn «Zarechnyı» JShS-niń 88,5 mıllıon teńge qarajatyna aýyldyń áleýmettik ınfraqurylymyn damytý baǵytynda 6 joba júzege asyrylyp jatyr.

Sonymen qatar, «Qaıyrymdy el - Aqmola» jobasy sheńberinde halyqtyń áleýmettik jaǵynan az qamtylǵan toptaryn qoldaý úshin 1 207 shara júzege asyrylýda. Áleýmettik jaǵynan az qamtylǵan 2 myń otbasy, 5 myń bala jáne 7 muqtaj adam 137,1 mıllıon teńge kóleminde materıaldyq kómek aldy. Stepnogorsk, Bestóbe jáne Shantóbe kentterinde demeýshilerdiń qarajatyna modeldi kitaphana ashyldy.

Sondaı-aq, qarttar men múmkindigi shekteýli jandarǵa kómek kórsetý boıynsha 215 eriktiniń basyn biriktiretin «Aq nıet - izgilik shýaǵyn tógeıik» jobasy da júzee asyrylýda.