Aqmolalyq kásipkerlerge til týraly zańǵa engizilgen ózgerister túsindirildi
Keńeste «Qazaqstan Respýblıkasyndaǵy til týraly» QR Zańyna engizilgen ózgerister men tolyqtyrýlar, sondaı-aq syrtqy kórneki jarnamalar men baqylaý kassa mashınalarynda memlekettik tildi qoldaný aıasy túsindirildi. Oǵan oblys ortalyǵynyń jáne ZOOM platformasy arqyly aýdandardyń kásipkerleri, Aqmola oblysy ishki saıasat basqarmasy basshysynyń orynbasary Gúlmıra Kárimova, Aqmola oblysy boıynsha memlekettik kirister departamentiniń «Baılanys ortalyǵy» bóliminiń basshysy Shynar Mýsına, Aqmola oblysy boıynsha tutynýshylardyń quqyqtaryn qorǵaý departamentiniń basshysy Svetlana Zanegına qatysyp, óz oılarymen bólisti.
Aqmola oblysy ishki saıasat basqarmasy basshysynyń orynbasary Gúlmıra Kárimovanyń aıtýynsha, Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyn júzege asyrý aıasynda kásipkerlerge habarlandyrýlar, jarnama, preıskýranttar, baǵa kórsetkishteri, as mázirleri, nusqaǵyshtar jáne basqa da kórneki aqparat memlekettik tilde, qajet bolǵan kezde orys tilinde jáne ózge de tilderde ornalastyrylatyny túsindirildi, zańnama talaptary jazylǵan paraqshalar taratylǵan.
«Búgingi jıyn kásipkerler úshin paıdaly boldy dep esepteımin. Elimizdiń árbir azamaty memlekettik tilde sóılep, kez kelgen orynda qazaq tilinde qyzmet kórsetýin talap etýi tıis. Memlekettik til – barlyq etnosty toptastyratyn baılanys quraly. Bul zańda kórsetilgen. Sondyqtan, osyndaı kezdesýlerdi jıi uıymdastyrý zań buzýshylyqtardyń aldyn alýǵa septigin tıgizedi», - deıdi jeke kásipker, saýda jáne qyzmetter komıtetiniń múshesi Danııar Erdenov.
Jıyn sońynda kásipkerler men jarnama agenttikterine ózderiniń qyzmetinde zańnama talaptaryn saqtaýda jaýapkershilikti kúsheıtý, Aqmola oblysy ishki saıasat basqarmasynyń janynan qurylǵan jedel jeli (25-81-09) arqyly jarnamalardy ornatpas buryn olardyń mátinderin tildik normaǵa sáıkes resimdelýine baılanysty tegin keńes alatyndyǵy aıtyldy.
Aıta ketsek, Aqmola oblysynyń ishki saıasat basqarmasyna jańa basshysy taǵaıyndaldy.
Foto: Іshki saıasat basqarmasynyń baspasóz qyzmeti
