Aqmolalyq kásipker tyńaıtqysh qoldanbaı qulpynaı ósirýde
KÓKShETAÝ. QazAqparat - Aqmola oblysy Ereımentaý aýdanynyń turǵyny memlekettik grant arqyly qulpynaı ósirýdi qolǵa alyp otyr, dep habarlaıdy «QazAqparat» HAA tilshisi.
Ereımentaý aýdanyndaǵy jeke kásipker Svetlana Mıroshnıchenko birneshe jyldan beri qulpynaı ósirýdi qolǵa alyp keledi. Jaqynda ol basqaratyn «Frýtıka» jeke kásipkerligine memleket tarapynan qaıtarymsyz 3 mıllıon teńge grant bólingen.
Kásipker bul qarjyǵa tamshylatyp sýarý jabdyqtaryn satyp alyp, otbasymen birge 0,7 gektar aýmaqqa qulpynaı ósirip otyr. Alqapta qulpynaıdyń remontantty sorty eshqandaı hımııalyq tyńaıtqyshsyz, tabıǵı jolmen ósirilýde. Qulpynaıdyń bul túri ónimdiligimen, ıaǵnı, bir maýsymda birneshe ret gúldep, ónim beretindigimen erekshelenedi.
«Biz ósirip otyrǵan qulpynaıdyń sapasy óte joǵary. Petıtsıdterdi múldem qoldanbaımyz. Sol sebepti, ashyq aspan astynda tabıǵı jolmen ósiriletin qulpynaıymyz dámdi ári adam aǵzasyna qajetti dárýmenderge toly. Jalpy, jıdekterge ruqsat etilgen nıtrattar mólsheri 60 mg/kg bolsa, bizdiń qulpynaıda bul kórsetkish 0,2 mg/kg quraıdy», - deıdi Svetlana Mıroshnıchenko.
Kásipkerdiń aıtýynsha ónim negizinen Astana qalasy men aýdan turǵyndaryna satylýda. Sapaly ónimge suranys joǵary. Alqapta eki adam eńbek etedi. Aldaǵy ýaqytta sharýashylyqty keńeıtý josparda bar.
