Aqmolalyq kásipker ózi turyp jatqan aýylda mektep turǵyzýda
ASTANA. QazAqparat - Aqmola oblysy Tselınograd aýdany Qosshy aýylynyń turǵyny Sara Mataıbaeva ózi turyp jatqan aýylǵa mektep salý úshin 350 mıllıon teńge bólgen. Bul týraly búgin OKQ-da ótken baspasóz máslıhatynda Aqmola oblysynyń ákimi Málik Myrzalın málim etti, dep habarlaıdy QazAqparat tilshisi.
«Bizdiń oblystyń turǵyndary Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn óte jyly qabyldady. Meniń oıymsha, aqmolalyqtar ásirese «Týǵan jer» baǵdarlamasyna erekshe den qoıǵan sekildi. Kóptegen adamdar, metsenattar óziniń týǵan aýyldaryna paıda tıgizýge asyqty. Men osyǵan deıin de birshama sandar men adamdardy ataǵan edim. Ondaı adamdar meni tamsandyrady da, tańǵaldyrady», - dedi óńir ákimi OKQ-da ótken baspasóz máslıhaty barysynda.
Málik Myrzalın sonymen birge, naqty mysaldardy keltirdi.
«Máselen, Tselınograd aýdanynda Sara Mataıbaeva degen kásipker bar. Onyń Qosshy aýylynda óndirisi jumys istep tur. Ony eshkim kóndirýge tyrysqan da emes. Ol Prezıdenttiń bastamasyn ilip áketti de, maǵan kelip: «Men Qosshyda mektep turǵyzǵym keledi», dedi. Ókinishke qaraı, Qosshy - áli kúnge deıin úsh aýysymdy mektepteri bar eldi meken. Ol kásipker: «Men mekteptiń kerektigin bilip turmyn», dedi. Óndirisinde jumys isteıtin qyzmetkerleriniń jaǵdaıyn kásipker jaqsy sezinip otyr. Men oǵan qandaı usynys bar degenimde, «Minekeı, men 350 mıllıon teńge bereıin. Mektep salamyn. 2018 jyldyń 1 qyrkúıeginde ótkizemin», dedi. Mine, bizdiń oblysta osyndaı adamdar turyp jatyr», - dedi Málik Myrzalın.
