Aqmolalyq dıqandar kóktemgi egis jumystaryna kiristi
KÓKShETAÝ. QazAqparat - Aqmola oblysynyń dıqandary dándi, burshaq jáne maıly daqyldardy sebý jumystaryna kiristi. Naýqanǵa 31,6 myń aýyl sharýashylyǵy tehnıkasy jumyldyrylady, dep habarlaıdy QazAqparat tilshisi oblystyq ishki saıasat basqarmasyna silteme jasap.
Aýyl sharýashylyǵy daqyldarynyń ishinde jazdyq bıdaıdyń úlesi zor. Búingi tańda 530 myń tonna tuqymy bar. Elıtalyq tuqymnyń egis kólemi 23,3 paıyzǵa ulǵaıtylyp, 365 myń gektardy qurap otyr.
Fermerlerge «Keń dala» baǵdarlamasy boıynsha 5 paıyzdyq jeńildikpen nesıe túrinde memlekettik qoldaý kórsetilýde. Dıqandar memleket tarapynan bólingen 24 mıllıard teńge qarjyǵa qol jetkize alatyn bolady.
«Bıylǵy jyly 15 myń gektar alqapqa tuqym sebý josparlanǵan. Onyń 10 myń gektaryna bıdaıdyń jumsaq tuqymy, 4 myń gektaryna arpa jáne 1 myń gektaryna zyǵyr sebiledi. Biz memlekettik baǵdarlama arqyly kómek alyp, onyń 50 paıyzyn ıgerdik. Bul qarjyǵa gerbıtsıd, janar-jaǵar maı satyp aldyq. Egis jumystaryn mamyr aıynyń 25-ne deıin aıaqtaý josparlanǵan», - deıdi Qorǵaljyn aýdanyndaǵy «Mıras-2000» JShS dırektory Dálel Júzbaev.
Aıta keteıik, bıyl oblys boıynsha 4,9 mıllıon gektar alqapqa dán sebý josparlanǵan. Onyń 4,4 mıllıon gektary dándi burshaq, 254 myń gektary maıly daqyldar, 181 myń gektary mal azyǵy, 16,1 myń gektary kartop jáne 3 myń gektary kókónis daqyldary.
