Aqmolalyq dıqandar kóktemgi egis naýqanyna qamdanyp jatyr

KÓKShETAÝ. QazAqparat - Aqmolalyq dıqandar kóktemgi egis jumystaryna ázirlenýde. Bıylǵy jyly oblys boıynsha 4,9 mıllıon gektar egistik alqapqa dán sebý josparlanǵan, dep habarlaıdy QazAqparat tilshisi oblystyq ishki saıasat basqarmasyna silteme jasap.

Oblystyq aýyl sharýashylyǵy basqarmasynyń málimetinshe, aýyl sharýashylyǵy daqyldarynyń ishinde jazdyq bıdaıǵa basymdyq berilip otyr.

Kóktemgi dala jumystaryn uıymshyldyqpen ótkizý arqyly mol ónim alýǵa bolady. Osyny túsingen aqmolalyq dıqandar naýqanǵa qyzý kirisip otyr.

«Oblysta arzandatylǵan baǵamen 70 myń tonna kepildendirilgen dızel otyny bólindi. Jalpy, aýyl sharýashylyǵy tehnıkasynyń daıyndyǵy - 98 paıyz. Jańa 133 tehnıka satyp alyndy», - dedi vedomstvodan.

Tuqym daıyndaý jáne tyńaıtqyshtarmen jumys isteý máselesine erekshe nazar aýdarylady.

Búginde oblysta akkredıttelgen zerthanalarda 450 myń tonnadan astam tuqymǵa tolyq taldaý júrgizilýde.

Mıneraldy tyńaıtqyshtardy jetkizýge sharttar jasaldy. Jarqaıyń aýdanynyń «Temirlan» JShS dırektory Erlan Alın bolashaq egis alqaby týraly óz josparyn bólisti.

«Bıyl bizde 45 myń gektar jerge egin egý mindeti qoıylǵan, onyń 41 myń gektarynan astamyna bıdaı, 3 myń gektaryna arpa, 200 gektaryna suly men qaraqumyq egiledi. Egis jumystaryn mamyr aıynyń ortasynda bastaýdy josparlap otyrmyz», - dedi kásipker.

Fermerlerge «Keń dala» baǵdarlamasy boıynsha jyldyq 5 paıyzben arzandatylǵan nesıe túrinde memlekettik qoldaý kórsetiledi.

Dıqandardy qoldaý retinde 17 mıllıard teńge qarjy bólinip otyr.

Aıta keteıik, aǵymdaǵy jyly oblys dıqandary 4,9 mıllıon gektarǵa tuqym sebýdi mejelep otyr.

Onyń 4,5 mıllıon gektary – dándi burshaq daqyldary, 216 myńy - maıly daqyldar, 200 myńy - jazdyq daqyldar, sondaı-aq, 15,6 myń gektarǵa kartop jáne 3,4 myńnan astam gektarǵa kókónis otyrǵyzylady.