Aqmolalyq dıqandar kóktemgi dala jumystarynyń 39 paıyzyn eńserdi
KÓKShETAÝ. QazAqparat- Bıylǵy jyly Aqmola oblysynyń dıqandary 4 mıllıon 744,8 myń gektar alqapqa dán sińirýdi josparlap otyr.
Kúni búginge deıin naýqandyq jumystardyń 39 paıyzy eńserildi, dep habarlaıdy «QazAqparat» HAA tilshisi.
Oblystyq aýyl sharýashylyǵy basqarmasynyń bólim basshysy Jumabek Ábýovtyń aıtýynsha, bıyl 4 mıllıon 744,8 myń gektar alqapqa dán egý josparlanyp otyr. Bul kórsetkish ótken jylǵy deńgeıden 6,7 myń gektarǵa kóp. Onyń ishinde dándi jáne burshaqty daqyldar 4 mıllıon 338,3 myń gektar alqapqa sińiriledi. Sondaı-aq, negizgi azyq-túlik daqyly bolyp sanalatyn jazdyq bıdaı 3 mıllıon 798,8 myń gektar jerge egiledi.
«Qazirgi jaǵdaıǵa toqtalsaq, josparlanǵan 2,2 mıllıon gektar alqaptyń ylǵaly tolyq jabyldy. 1,8 mıllıon gektar jerge egis aldyndaǵy óńdeý júrgizildi. Onyń 600 myń gektary hımııalyq ádispen óńdeldi. Egis aldyndaǵy óńdeý jumysy odan ári jalǵasýda. Bıylǵy jylǵy aýa raıynyń qolaısyzdyǵyna baılanysty oblys dıqandary dándi daqyldar egý jumysyn sál kesheýletip - 15 mamyrda bastap, maýsymnyń 2-ine deıin tolyq aıaqtap shyǵýdy mejelep otyr. Búginge deıin dándi daqyldar tuqymynyń 39 paıyzy sińirildi, onyń 1,5 mıllıon gektar alqaby - bıdaı, 183 myń gektary - maıly daqyldar.
Birjyldyq shóp egý jumystary da júrgizilýde.
Naýqanǵa barlyǵy 17 myń tuqym sepkish, 1145 ónimdiligi joǵary egis kesheni jumyldyrylýda. Oblystaǵy kóktemgi egis jumystaryn ótkizý úshin 79,2 myń tonna dızel otyny, 7,4 myń tonna benzın jáne 4,6 myń tonna maı qajet bolsa, búgingi tańda oblystyń sharýashylyqtary 91 paıyz dızel otynymen, 100 paıyz benzınmen jáne maımen qamtylǵan», - deıdi J.Ábýov.
