Aqmolalyq dıqandar 4,7 mln gektardan astam alqapqa dán egedi
KÓKShETAÝ. QazAqparat - Aqmola oblysynyń dıqandary bıyl 4,7 mıllıon gektardan astam alqapqa dán sebýdi mejelep otyr. Bul týraly búgin aımaq basshysy Məlik Myrzalınniń tóraǵalyǵymen ótken agrokeńeste aıtyldy, dep habarlaıdy QazAqparat HAA tilshisi.
Keńeste baıandama jasaǵan oblys ákiminiń orynbasary Asqarbek Úısimbaevtyń aıtýynsha, kóktemniń kelýimen, dıqandar úshin de eń jaýapty kezeń bastaldy. Olar birer kúnnen soń kóktemgi dala jumystaryna kiriskeli otyr. Alda qaýyrt jumys kútip tur. Osy oraıda, kóktemgi egis naýqanyn tıimdi ýaqytta júrgizip, sapaly ónimge qol jetkizý úshin bar kúshimizdi, óndiristik jáne kadrlyq áleýetimizdi jumyldyrýymyz qajet.
«Oblysymyzdyń ótken jylǵy aýyl sharýashylyǵy ónerkásiptik kesheniniń damý nátıjesin qorytyndylaı kele, kóktemgi dala jumystarynyń jáne oraq naýqanynyń uıymshyldyqpen ótkizilip, zamanaýı tehnologııalardyń engizilýiniń arqasynda oblystyń agrarshylary 2017 jyly gektar berekesin 12 tsentnerden aınaldyryp 5,1 mıllıon tonna ónim alǵanyn atap ótkimiz keledi.
Bıylǵy jyly oblys boıynsha egisti 4,7 mıllıon gektardan astam alqapta júrgizý josparlanǵan. Onyń 4,3 mıllıon gektaryna dándi daqyldar sińiriledi. Ońtaılandyrý aıasynda negizgi azyq-túlik daqyly- jazdyq bıdaı 3,7 mıllıon gektar alqapqa sebiledi», - dedi A.Úısimbaev.
