Aqmolalyq daryndy oqýshylar «Elbasy medalimen» marapattaldy
KÓKShETAÝ. QazAqparat - Naýryz meıramy qarsańynda Aqmola oblysynyń ákimi Ermek Marjyqpaev bilim saıystarynda joǵary nátıjege qol jetkizgen daryndy balalardy «Elbasy medali» qola nagradasymen marapattady, dep habarlaıdy QazAqparat tilshisi.
Kókshetaýdaǵy «Dostyq úıinde» ótken sharada 41 oqýshy «Elbasy medaline» ıe boldy.
«Barshańyzdy Tuńǵysh Prezıdentimizdiń atynan marapattaryńyzben quttyqtaımyn!. Táýelsizdigimizdiń odan ári nyǵaıyp, elimizdiń gúldenýi búgingi jastardyń, sizderdiń qoldaryńyzda! Sizderdeı bilimdi ári áleýeti keń árbir qazaqstandyq azamattyń memleketimizdiń gúldenýine jeke úlesin qosatynyna senimdimin» - dedi sharada quttyqtaý sóz sóılegen aımaq basshysy Ermek Marjyqpaev.
Vedomstvodan atap ótkendeı, Aqmola oblystyq máslıhaty sessııasynyń 2020 jylǵy 10 maýsymdaǵy sheshimi boıynsha «Elbasy medali» baǵdarlamasyn iske asyrýǵa 40 mıllıon teńge bólindi. 2021 jyly baǵdarlamany júzege asyrý úshin 69 mıllıon 888 myń teńge bólinip otyr.
Aıta keteıik, «Elbasy medali» - Elbasynyń baqylaýymen atqarylatyn talantty jáne básekege qabiletti jastardy tárbıeleý jónindegi biregeı joba. Joba 14-29 jas aralyǵyndaǵy jastardy tárbıeleýge baǵyttalǵan jáne 7 baǵyt boıynsha damý baǵdarlamasyn kózdeıdi: sport, daryn men daǵdy, kitap oqý, ulttyq mura, eriktilik, saıahat pen joryqtar, eńbek tájirıbesi. Qatysýshylar úsh deńgeıdi tańdaı alady: qola, kúmis nemese altyn, olar 6 aıdan 18 aıǵa deıin ár baǵyt boıynsha belgili bir qyzmetti oryndaýdy kózdeıdi. Qazirgi ýaqytta jobaǵa 11 myńnan astam qatysýshy, 600 tálimger, 17 óńirlik úılestirýshi men sarapshy qatysýda. Byltyr Táýelsizdik merekesi qarsańynda barlyq óńirlerdegi 300 jobaǵa qatysýshy qola medalmen marapattaldy.
Jyl boıy ótetin «Elbasy medali» baǵdarlamasyna qatysýǵa ótinimder qabyldaý jalǵasýda. Kelesi fınalıster 2021 jyldyń jeltoqsanynda belgili bolady.
