Aqmolalyq dárigerler naýqastyń asqazanynan 800 gramnan astam metall zat aldy
KÓKShETAÝ. QazAqparat – Aqmola oblysynda dárigerler naýqastyń asqazanynan 800 grammnan astam túrli metall zat aldy.
Bul týraly Kókshetaýdaǵy Aqmola oblystyq kópbeıindi aýrhanasynyń Instagram -daǵy paraqshasynda jarııalandy, dep habarlaıdy QazAqparat tilshisi
Áleýmettik jelidegi jazbada aýrhananyń hırýrgteri B. Ahmetov, J. Qabdiráshıtov, R.Smaıylov jáne anestezıologtar L.Áshimova, I.Haırova naýqastyń asqazanyndaǵy bógde zatty alý boıynsha hırýrgııalyq operatsııa jasaǵany jazylǵan.
«Naýqastyń asqazanynan salmaǵy 800 grammnan astam bógde zat, ıaǵnı, 112 dana metall zat alyndy. Naýqas zattardy óziniń dene múshesine qasaqana zııan keltirý úshin jutqan», - dep kórsetilgen jazbada.
Jazbadaǵy sýretten dárigerler naýqastyń asqazanynan shrýptar men tyrnaq qıǵysh sııaqty zattardyń alǵanyn kórýge bolady.
