Aqmolalyq armrestlerler Álem chempıonatynda 3 altyn medal ıelendi
KÓKShETAÝ. QazAqparat - Aqmolalyq armrestlerler Rýmynııada ótken Álem chempıonatynda 3 altyn medal ıelendi, dep habarlaıdy QazAqparat tilshisi.
Aqmola oblystyq dene shynyqtyrý jáne sport basqarmasynyń málimetinshe, Konstantse qalasynda ótken baıraqty jarysqa álemniń 54 elinen 1500-ge jýyq sportshy qatysty. Ulttyq qurama sapynda bolǵan aqmolalyq armrestlerler ár deńgeıdegi 6 medal ıelendi.
«Naqtyraq aıtsaq, jastar arasynda 65 keli salmaqta synǵa túsken Dmıtrıı Tıýkov sol qolymen qarsylastarynyń barlyǵyn jeńip, álem chempıony atandy. Bul onyń álem chempıonatyndaǵy ekinshi altyn júldesi.
Sonymen qatar, estý qabileti nashar áıelder arasynda 70 keliden joǵary salmaqta Lıýbov Gergert sol qol kúresinde jarys jeńimpazy atansa, erler arasynda 100 keliden joǵary salmaqta Andreı Pýtıntsev bir altyn jáne bir kúmis júldege qol jetkizdi.
Budan bólek, tirek qımyl apparaty buzylǵan áıelder arasynda sol qol kúresinde Svetlana Lopata úshinshi, jastar arasynda 90 keli salmaqta oń qol kúresinde Danıl Borısov besinshi orynǵa turaqtady», - deıdi Aqmola oblystyq dene shynyqtyrý jáne sport basqarmasynyń baspasóz hatshysy Mahabbat Bolshına.
