Aqmolalyq ardagerler Joldaý men konstıtýtsııalyq reformalardy talqylady

KÓKShETAÝ. QazAqparat - Kókshetaýda Aqmola oblystyq Ardagerler keńesiniń aktıvi Elbasynyń Joldaýy men konstıtýtsııalyq reformalar jobasyn, sondaı-aq ardagerler uıymdarynyń ótken jylǵy jumys qorytyndylary men aldaǵy josparlaryn talqylady, dep habarlaıdy "QazAqparat" HAA tilshisi. 

Sharaǵa qatysqan oblys ákiminiń orynbasary Nurlan Nurkenov óz sózinde ardagerlerdi Memleket basshysynyń usynysymen qabyldanǵan 1 naýryz - Alǵys kúnimen quttyqtady. Oblystyq ishki saıasat basqarmasynyń basshysy Aına Mysyrálimova Qazaqstan Respýblıkasy Prezıdenti usynǵan konstıtýtsııalyq reformalar jobasy týraly jan-jaqty baıandap berdi. Bılik tarmaqtaryn bólýge qatysty Eńbekshilder aýdandyq ardagerler keńesiniń tóraǵasy Vasılıı Ýstıantsev pen Ereımentaý aýdandyq ardagerler keńesiniń tóraǵasy Tólegen Ábdın de óz oı-pikirlerimen bólisti.

Oblystyq Ardagerler keńesiniń tóraǵasy Ǵosman Tóleǵuldyń aıtýynsha, búgingi kúni oblysta 109 990 zeınetker bar. ıAǵnı, ardagerler uıymy aımaǵymyzdaǵy eń iri qoǵamdyq uıym bolyp sanalady. 

2016 jyly elimiz boıynsha atalyp ótken Táýelsizdigimizdiń 25 jyldyǵy mereıtoıynan ardagerler de tys qalǵan joq. Barlyq óńirlerde ardagerler uıymdary táýelsizdigimizdiń torqaly toıyna arnap túrli sharalar ótkizdi. Ardagerlerdi áleýmettik jaǵynan qoldaýǵa árdaıym jetkilikti dárejede kóńil bólinedi. Ótken jyly 105 303 zeınetker túrli áleýmettik kómekter alǵan. 1002 ardager shıpajaılarǵa tegin joldama alyp, densaýlyqtaryn túzep qaıtty.

Ardagerler mádenı-sporttyq sharalardan da syrt qalmaıdy. Shahmat-doıby jarysy ótkizilip, úzdik shyqqandar baǵaly syılyqtarmen marapattaldy. Taǵy bir atap óterligi, ótken jyly Kókshetaýda tuńǵysh ret ardagerler qazaqtyń ulttyq oıyny - asyq atý jarysyn ótkizdi. Bıylǵy jyly ótkiziletin sharalardyń barlyǵy ardagerler uıymynyń qurylýynyń 30 jyldyq mereıli datasyna arnalmaq.