Aqmolalyq ardager sambodan Qazaqstan chempıony atandy
KÓKShETAÝ. QazAqparat - Aqmolalyq ardager Bolatbek Qojaev sambodan Qazaqstan chempıony atandy, dep habarlaıdy QazAqparat tilshisi.
Aqmola oblystyq dene shynyqtyrý jáne sport basqarmasy baspasóz qyzmetiniń málimetinshe, Túrkistan qalasynda ardagerler arasynda sambodan Qazaqstan chempıonaty ótti. Jarysqa elimizdiń ár óńirinen 200-den astam sportshy qatysyp, sheberligin ortaǵa saldy. Olardyń arasynda Aqmola oblysynan barǵan samboshylar bir altyn jáne úsh kúmis medal ıelendi.
«Chempıonatta 55-59 jastaǵylar arasynda 90 keli salmaqta synǵa túsken atbasarlyq Bolatbek Qojaev qarsylastaryn tize búktirip, altyn medal ıelendi. Sondaı - aq, 35-39 jastaǵylar arasynda (100 keliden joǵary salmaqta) bulandylyq Kópjasar Knıazov, 50-54 jastaǵylar arasynda (74 keli salmaqta) qorǵaljyndyq Murat Túsipbekov, 65 jáne odan joǵary jastaǵylar arasynda stepnogorlyq Smaǵul Ahmetjanov kúmis júldeger atandy», - deıdi vedomstvonyń baspasóz hatshysy Mahabbat Bolshına.
