Aqmolalyq agrarshylar elordaǵa 780 tonna ónim alyp keldi
ASTANA. 13 qazan. QazAqparat - Búgin Astananyń eski ortalyq alańynda Aqmola oblysynyń aýylsharýashylyq jármeńkesi ótýde.
Bul óńirdiń agrarshylary óz ónimderin qala halqyna naryq baǵasynan 15-20 paıyz arzan baǵamen satýda.
Kásipkerler Astanaǵa shamamen 780 tonna azyq-túlik ónimderin ákelgen. 36 túrli ónimniń jalpy somasy 145 mln. teńgege baǵalanyp otyr. Olardyń ishinde 110 tonna et jáne et ónimderi, 34 tonna shujyq ónimderi, 28 tonna sút ónimderi, 150 tonna un, 250 tonna kartop jáne 28 tonna nan ónimderi bar.
Sondaı-aq, agrarshylar astanalyqtarǵa kondıterlik ónimderin, bal, tuzdalǵan kókónister, tosap jáne jemis-jıdekterin ala kelipti. Tipti qol óner sheberlerin de óz buıymdaryn satýǵa shyǵardy.
Jármeńkege jınalǵan qaýym arzan baǵaǵa azyq-túlik satyp alyp qana qoımaı, oblys aýdandarynyń ónerpazdary daıyndap kelgen kontserttik baǵdarlamany tamashalaýǵa múmkindik aldy.
Sonymen qatar, alańǵa altybaq ornatylyp, aqshańqan kıiz úıler tigildi. Alań ortasynda túrli ulttyq oıyndar uıymdastyrylyp, jeńimpazdarǵa qap-qap aýylsharýashylyq ónimderi syılyqqa berilýde.
