Aqmolalyq 50 sábıge baby-boks syıǵa tartyldy
«Súıinshi» syıqorabyna Qazaqstan Respýblıkasynyń Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy jáne balanyń týý týraly kýáligi salynǵan.
«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Memleket basshysynyń quttyqtaý hatynda.
16 jáne 17 jeltoqsanda týǵan balalarǵa týý týraly kýálikti alý týraly ótinimderdi «Azamattarǵa arnalǵan úkimet» memlekettik korporatsııasynyń qyzmetkerleri qabyldap, ári qaraı Qazaqstan azamatynyń alǵashqy qujatyn resimdeý úshin AHAJ organdaryna joldandy.
«Súıinshi» syıqorabyna ıe bolǵandardyń arasynda kókshetaýlyq Áıgerim Ysqaqova da bar. Ol jeltoqsannyń 16-da qyz balany dúnıege ákelgen. Náresteniń salmaǵy 3 keli 788 gramm, boıy 53 santımetr. Ata-anasy onyń esimin Azıza qoıǵan. Sábıdiń ata-anasy qýanyshtaryna ortaqtasyp, syı-qurmet kórsetkenderge sheksiz alǵysyn bildirýde.
Jalpy, Aqmola oblysynda 16 jáne 17 jeltoqsan kúnderi dúnıege kelgen 50 sábıdiń ata-anasyna Memleket basshysynyń quttyqtaý tilegi jazylǵan baby-bokstar syıǵa tartyldy. Onyń 22-i Kókshetaý qalasynda tirkelgen.
Aıta ketý kerek, «Súıinshi» syıqoraptaryn QR Tsıfrlyq damý, ınnovatsııalar jáne aeroǵarysh mınıstrligi «Azamattarǵa arnalǵan úkimetpen birge jáne QR Ulttyq bank, Tsentrkredıt banki jáne «Qazposhta» AQ qatysýymen uıymdastyryp otyr.
