Aqmolalyq 3 jasóspirim qaskóı zorlamaq bolǵan áıeldi qutqardy
KÓKShETAÝ. QazAqparat - Aqmola oblysynyń Aqkól qalasynda úsh jasóspirim 56 jastaǵy er adam zorlamaqshy bolǵan áıelge arasha tústi, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, 9 naýryzda temirjoldyń boıymen jumystan úıine kele jatqan áıelge kúdikti shabýyl jasaǵan. Er adam áıeldi soqqyǵa jyǵyp, zorlamaqshy boldy. Osy kezde sol mańnan ótip bara jatqan 14, 17 jáne 18 jastaǵy jasóspirimder áıeldiń janaıǵaıyn estip, kómekke umtyldy. Balalar polıtsııaǵa qońyraý shalyp, kómekke shaqyrǵan.
«Áıeldi zorlamaqshy bolǵan kúdikti oqıǵa ornynan qashyp ketti. Alaıda, polıtsııa ony izin sýytpaı qolǵa túsirdi. Jasóspirimder men zardap shegýshi qaskóıdi birden tanydy», - dedi vedomstvonyń baspasóz qyzmetindegiler.
Belgili bolǵandaı, kúdikti – Aqkól qalasynyń buryn sotty bolǵan 56 jastaǵy turǵyny. Onyń ústinen Qylmystyq kodekstiń «Zorlaý áreketi» babymen sotqa deıingi tergeý amaldary bastaldy.
