Aqmolalyq 120 teńgege termopod utyp aldy
KÓKShETAÝ. QazAqparat - Qazaqstan Respýblıkasy Qarjy mınıstrliginiń Memlekettik kirister komıteti «Atameken» ulttyq kásipkerler palatasymen birlesip, osymen úshinshi ret utysqa avtokólik tigýde. Utysqa qatysý úshin satyp alǵan taýardyń chegin joldaý qajet. Utys talaptary týraly QazAqparat tilshisine Aqmola oblysy boıynsha memlekettik kirister departamentiniń basqarma basshysy Shynar Mýsına aıtyp berdi.
«Aǵymdaǵy jyldyń 21 mamyrynan bastap, Memlekettik kirister komıteti men «Atameken» ulttyq kásipkerler palatasy birlesip «Chek talap et-syılyq utyp al» aktsııasyn qolǵa aldy. Turǵyndarǵa qolaıly bolý úshin aktsııa «kóleńkeli» ekonomıkamen kúresý boıynsha «Wipon» mobıldi qosymshasy arqyly elektrondy formatta júzege asyrylady. Aktsııaǵa QR kez kelgen azamaty qatysa alady. Ol úshin arnaıy mobıldi qosymshany júktep, fıksaldi chektiń sýretin jiberý qajet», - deıdi Sh. Mýsına.
Aktsııa jeltoqsannyń 15-i kúni bas júldeni tapsyrý kezinde máresine jetedi. Ázirge, Aqmola oblysy boıynsha memlekettik kirister departamenti aı saıyn syılyqtardy utysqa qoıýda.
«Bul aktsııanyń maqsaty - tutynýshylar quqyǵyn qorǵaý. Sizder bilesizder me, chekter tutynýshy árbir zatty satyp alǵan saıyn berilýge mindetti jáne olar óz kezeginde «kóleńkeli» qarajatty aınalymǵa túsirmeýge septigin tıgizedi. Eger qandaı da bir saýda orny satqan taýary úshin chek bermese, sýretin túsirip alyp, bizge jiberesiz. Óıtkeni baqylaý-kassalyq apparatynsyz jasalǵan árbir saýda «kóleńkede» qalǵan aqsha men el bıýdjetine túspegen salyq degen sóz. Chek almasańyz, sonymen qatar taýar jaramsyz bolyp shyqsa, zańdy túrde qaıtara da almaısyz», - dep túsindirdi Sh. Mýsına.
Qazirgi kezde, aktsııaǵa barlyǵy 14 myń 310 adam qatysýda. Al, joldanǵan chekterdiń sany 921 myń 944 quraıdy. Bıylǵy jyly 9 adam syılyqqa ıe boldy. Onyń ishinde bir adam 120 teńgeniń chegine termopod utyp aldy.
