Aqmolalyqtarǵa ınvataksı nege jetispeıdi

KÓKShETAÝ. KAZINFORM – Aqmola oblysynda ınvataksı qyzmetine suranys joǵary. Alaıda múgedektigi bar adamdardy tasymaldaýǵa arnalǵan arnaıy avtobýstar tolyq paıdalanylmaı otyr, dep habarlaıdy Kazinform.

Qazirgi tańda oblysta ınvataksı qyzmetin Kókshetaý men Petropavldaǵy eki kompanııa ǵana kórsetedi. Ekeýi de aımaqta kólik tapshylyǵy baryn moıyndaıdy.

– Búginde mende tórt kólik qana bar, qalanyń qajettiligin tehnıkalyq turǵyda tolyq jaba almaımyn. Ásirese tańerteń júkteme joǵary. Kelisimshart boıynsha oqýshylar men jumys isteıtinderge basymdyq beriledi. Dál sol ýaqytta olar oqýǵa jáne jumysqa barady, – dedi «Shans» múgedekterdi ońaltý ortalyǵynyń jetekshisi Vasılıı Shımanskıı.

«Strength in Unity» qoǵamdyq birlestiginiń tóraıymy Lázzat Aıapbergenovanyń aıtýynsha, oblys ortalyǵyna qazirgi bar kólik jetkiliksiz.

– Iá, kólik shynymen jetispeıdi. Kókshetaý – shaǵyn qala, biraq bul qyzmetke 10 jetkizýshi qosylsa da, báribir azdyq etedi. Sebebi árkimniń júrý jaǵdaıyna qatysty talaptary bar, – dedi ol.

Vasılıı Shımanskıı tapshylyqtyń negizgi sebebin ınvataksı qyzmetin paıdalana alatyn tizimniń keńeıýimen baılanystyrady. Oǵan endi estý qabileti nashar adamdar, aýtızm spektri buzylystary men Daýn sındromy bar balalar da engizilgen.

– Óte keń tizim jasaldy. Al meniń kólikterim negizinen arba paıdalanýshylarǵa beıimdelgen. Bul sheshimdi jetkizýshilermen kelisýsiz qabyldaǵan Kólik mınıstrligin dıalogqa shaqyrǵymyz keledi, – dedi ol.

Aıta keteıik, jeltoqsannan bastap ınvataksı qyzmeti áleýmettik qyzmetter portalyna engiziledi. Bul jaǵdaıda konkýrstar ótkizilmeıdi, al qyzmetti alýshylar jetkizýshini ózderi tańdaıdy.

– Másele mynada: tizimge engizilgenderdiń kóbi qaladaǵy qoǵamdyq kólikti de paıdalana alady. Qala 80 arnaıy avtobýspen – pandýstary bar tómen edendi kóliktermen qamtamasyz etken. Biraq bárine taksı úıge kelgen yńǵaıly. Bul – ekiushty jaǵdaı. Osylaısha biz adamdardyń qoǵamǵa beıimdelý yntasyn ózimiz tómendetip otyrmyz. Eshbir oblystyq bıýdjet mundaı shyǵyndy kótere almaıdy. Tek aýyr toptarǵa – arba paıdalanýshylar, sklerozǵa shaldyqqandarǵa kóshý qajet. Qazirdiń ózinde tańerteńgi suranysty jabý úshin 20-30 kólik kerek. Saǵat 11-den keıin aǵyn azaıady. Al saǵat 15:00-de mektepten jáne jumystan qaıtar kezde júkteme qaıta kúsheıedi, – dedi Vasılıı Shımanskıı.

Aıta keteıik, Qyzylordada ınvataksı qyzmetine qatysty shaǵym kóp.