Aqmolalyqtar júrgizýshi kýáligin qalpyna keltiremin degen alaıaqqa aldanyp qaldy

KÓKShETAÝ. KAZINFORM — Aqmola oblysynyń úsh turǵyny júrgizýshi kýáligin qaıtaryp berýge ýáde etken adamǵa senip qalǵan. Alaıaq ustalyp, qamaýǵa alyndy, dep habarlady óńirlik polıtsııa departamentiniń baspasóz qyzmeti.

Polıtsııa málimetinshe, 23 aqpanda Sandyqtaý aýdany polıtsııa bólimine Petrovka aýylynyń turǵynynan alaıaqtyq faktisi boıynsha aryz túsken.

«Jábirlenýshiniń aıtýynsha, 2024 jyldyń qazan aıynda az tanys er adam onyń 470 myń teńge kólemindegi aqshasyn ıemdenip ketken. Kúdikti 2022 jyly mas kúıinde kólik basqarǵany úshin júrgizýshi kýáliginen aıyrylǵan azamatqa ony qaıta qalpyna keltirýge kómektesemin dep ýáde bergen», dep málimdedi polıtsııa ókilderi.

Tekserý barysynda bul úshinshi osyndaı derek ekeni anyqtaldy. Kúdikti Balkashıno kentiniń turǵyny bolyp shyqty. Ol ózin júrgizýshi kýáligin qalpyna keltirýge jáne tıisti sanatty rásimdeýge yqpal ete alatyn adam retinde tanystyrǵan.

«Aldyn ala málimetter boıynsha, jábirlenýshilerge keltirilgen jalpy shyǵyn shamamen 2 mıllıon teńgeni qurady. Qazirgi ýaqytta er adam qamaýda. Tergeý áreketteri júrgizilip jatyr», delingen resmı aqparatta.

Polıtsııa qyzmetkerleri sottyń kólik quralyn basqarý quqyǵynan aıyrý týraly sheshimderi joıylmaıtynyn eske saldy.

Aıta keteıik, Pavlodarda alaıaqqa aldanǵan zeınetkerdiń 2 mln teńgesi polıtsııa kómegimen qaıtaryldy.