Aqmolalyqtar jappaı «Qara jorǵa» bılep, rekordtar kitabyna endi
KÓKShETAÝ. KAZINFORM – Bıyl Kókshetaý óńirdiń mádenı ortalyǵy retindegi mártebesin taǵy bir márte dáleldep, Naýryz merekesin jarqyn ári mazmundy is-sharalar legine aınaldyrdy.
Bir mezette «Qara jorǵa» bıin jappaı oryndaý jáne «bes asyq» ulttyq oıynyn qatar oınaý boıynsha eki birdeı jetistik Qazaqstan rekordtar kitabyna endi. Sonymen qatar, qalada 50 taqyryptyq kıiz úıden turatyn biregeı joba júzege asyryldy.
Eń áserli sátterdiń biri — «Qara jorǵa» bıiniń jappaı oryndalýy boldy. Bir alańda 2 myńnan astam er azamat — aqsaqaldar, zııaly qaýym ókilderi, eńbek ujymdary, áskerı qyzmetshiler, sportshylar men jastar bir yrǵaqta bı bıledi. Ulttyq shapan kıgen qatysýshylardyń úılesimdi qımyly urpaqtar sabaqtastyǵynyń sımvolyna aınalyp, qoǵamdyq birliktiń jarqyn kórinisin kórsetti.
Sonymen qatar óńir taǵy bir rekord ornatty: 1500 mektep oqýshysy bir ýaqytta «bes asyq» oıynyn oınady. Bul aýqymdy shara jas urpaqtyń ulttyq dástúrler men mádenı muraǵa degen qyzyǵýshylyǵynyń artyp kele jatqanyn aıqyn kórsetti. Eki jetistik te resmı túrde Qazaqstan rekordtar kitabyna tirkelip, uıymdastyrý deńgeıiniń joǵary ekenin jáne turǵyndardyń belsendi qatysýyn dáleldedi.
Merekelik sharalar 50 kıiz úıden quralǵan etnoaýylmen jalǵasyn tapty. Árbir kıiz úı jeke mádenı keńistikke aınalyp, qonaqtarǵa halyq qolóneri, salt-dástúrler, ulttyq taǵamdar men ádet-ǵuryptardy tanystyrdy. Sonymen qatar ınteraktıvti sheberlik sabaqtary men ulttyq oıyndar uıymdastyryldy. Erekshe nazar Kókshetaýdyń tarıhı joly men búgingi damýyn kórsetetin taqyryptyq kórmelerge aýdaryldy.
Aqmola oblysynyń ákimi Marat Ahmetjanov naýryz meıramynyń bizdiń halqymyz úshin mańyzyn aıtyp, quttyqtaý lebizin bildirdi.
— Qasıetti Aqmola jeri — qashanda eldiktiń týy tigilgen, birliktiń besigi bolǵan, asyl ónerdi baǵalaǵan daryndy tulǵalar mekeni. Búgin alty jasar baladan alpys jastaǵy kərige deıin er azamattarymyz «Qara jorǵa» bıiniń keremet úlgisin, halqymyzdyń rýhanı baılyǵyn, rýhyn pash etip otyr. «Qara jorǵa» bıi — ulttyq biregeıligimizdiń aıǵaǵy. Bul bı — tek qımyl-qozǵalys emes.Ol — attyń júrisin, dalanyń erkindigin jáne halyqtyń kóńil-kúıin sýretteıtin óner týyndysy. Ǵasyrdan-ǵasyrǵa jalǵasyp kele jatqan halqymyzdyń kıeli ónerin qurmettep, jańǵyrtý, ony keıingi jas urpaqtyń sanasyna sińirý — bizdiń mindetimiz, dedi ol.
Osylaısha, Kókshetaýda ótken Naýryz merekesi ulttyq dástúrler men ortaq qundylyqtar aıasynda óńir turǵyndaryn biriktirgen, urpaqtar sabaqtastyǵyn dáriptegen mańyzdy oqıǵaǵa aınaldy.