Aqmolalyqtar 25 myń aǵash egip, 100 myń sharshy metr aýmaqty qoqystan tazartty
KÓKShETAÝ. KAZINFORM — Aqmola oblysynda Qazaqstan Prezıdenti bastamashylyq etken bıylǵy eń aýqymdy ekologııalyq sharalardyń biri — «Taza Qazaqstan» aktsııasy ótti, dep habarlaıdy óńirlik ishki saıasat basqarmasy.
Bul kúni aýmaqtardy tazalaýǵa 30 myńnan astam adam shyqty. Óńir turǵyndary 100 myń sharshy metrden astam jerdi tazartyp, 25 myń aǵash pen buta otyrǵyzdy.
Kókshetaýdan bastap oblystyń eń shalǵaıdaǵy aýyldaryna deıin birtutas ekologııalyq qozǵalysqa atsalysty. Aktsııaǵa otbasylar, eńbek ujymdary, mektep oqýshylary men eriktiler qatysty. Adamdar úshin bul resmı mindet emes, týǵan jerdiń tazalyǵyna qosqan jeke úlesi ekeni — qoldaryna qap alyp, kelgen kóshilikten tamasha kóńil-kúıinen birden baıqaldy.
Elorda mańyndaǵy aýdandarǵa árkezdegideı erekshe nazar aýdaryldy. Talapker aýylynda júzdegen aktsııa qatysýshysy jaǵalaý men úı-jaılardyń mańyn tazartyp, myńǵa jýyq jas aǵash-qaraǵaı, tal jáne alma aǵashtaryn otyrǵyzdy. Aǵash otyrǵyzýǵa oblys ákimi Marat Ahmetjanov ta qatysty.
— Memleket basshysy Qasym-Jomart Kemeluly Toqaev ekologııalyq mádenıet árbir azamattyń kúndelikti ómiriniń bir bóligine aınalýy kerektigin birneshe ret atap ótti. Aqmola oblysynda bul jumys júıeli túrde júrgizilip jatyr. Sońǵy jyldary ǵana biz eki myń gektardan astam aýmaqqa 16 mıllıonǵa jýyq aǵash otyrǵyzdyq. Búgin óńirdiń taza jáne jasyl bolashaǵynyń sımvoly bolatyn taǵy 25 myń kóshet qosamyz, — dep atap ótti Marat Ahmetjanov.
Aktsııanyń aýqymy shynymen tań qaldyrarlyq: ekologııalyq is-sharalar oblystyń 240 eldi mekeninde bir ýaqytta ótti. Arshaly aýdanynda bir jarym myń adam tazalaý jumystaryna qatysyp, 15 myń sharshy metr aýmaqty tazartyp, 400-den astam aǵash otyrǵyzdy. Birjan sal aýdanynda 820 jańa qylqan japyraqty kóshetter — qaraǵaı men shyrshalar paıda boldy. Astrahan aýdanynda aktsııa barlyq 11 aýyldyq okrýgte ótti. Al Zerendi aýdanynda oqýshylar men «Kókshetaý» ulttyq parkiniń qyzmetkerleri mektepter men sport nysandarynyń janyna aǵash otyrǵyzyp, qoǵamdyq keńistikterdiń ásemdigine erekshe nazar aýdardy.
Kókshetaýda aktsııa naǵyz ekologııalyq merekege aınaldy. Jańa «Jańa Jaǵalaý» jaǵalaýynda júzdegen alma aǵashtary men jupargúl butalary otyrǵyzyldy. Eski bóligi — «Eski Jaǵalaý» — qaraǵaı, úıeńki jáne qaraǵash aǵashtarymen bezendirildi, al «Máńgilik Alaý» memorıalynyń janynda qylqan japyraqty aǵashtar paıda boldy. Bir kúnde qalada tórt myńnan astam ósimdik otyrǵyzyldy, onyń 3,6 myńy — aýlalarda, saıabaqtarda jáne qoǵamdyq oryndardaǵy aǵashtar.
Kókshetaý turǵyndary aktsııany erekshe yntamen qabyldady.
— Búgin bizdiń kitaphananyń 25-ke jýyq qyzmetkeri jaǵalaýdy kógaldandyrýǵa qatysty. Bul jaı ǵana jumys emes — bul qýanysh. Biz Kókshetaýdyń qalaı ózgerip, tazaryp, kórkeıip jatqanyn kórip otyrmyz. Osyndaı bastamalar jıi ótkizilse eken deımiz — óıtkeni birlese jasalǵan qamqorlyq adamdardy biriktiredi, — dedi Ortalyq qalalyq úlgili balalar men jasóspirimder kitaphanasynyń meńgerýshisi Baqytgúl Qalıeva.
Іshki saıasat basqarmasynyń habarlaýynsha, aktsııanyń eń negizgi qatysýshylary jáne qozǵaýshy kúshi jastar qaýymy boldy. Senbilikterge stýdentter, oqýshylar men eriktiler qatysty. Jyl basynan beri oblysta tórt myńnan astam ekologııalyq is-shara ótkizilip, oǵan 70 myńnan astam jas adam qatysqan.