Aqmolalyq zeınetkerge flıýrografııa protsedýrasy 9 mıllıon teńgege tústi

ASTANA. KAZINFORM — Alaıaqtar azamattardy aldaýdyń jańa ádisin oılap taýyp, oǵan Stepnogorsk qalasynyń 75 jastaǵy turǵyny túsip qaldy.

Oblystyq polıtsııa departamentiniń málimetinshe, bıyl tamyz aıynda ózin emhana qyzmetkerimin dep tanystyrǵan belgisiz bireý Stepnogorsk qalasynyń 75 jastaǵy turǵynyna habarlasqan.

— Er adam zeınetkerge keýde qýysynyń rentgenin túsirý kerek ekenin aıtyp, ony belgili bir kúnge aldyn ala jazyp qoıa alatynyn aıtady. Beıtanys adamǵa sengen aqmolalyq zeınetker 1414 nómirinen kelgen kodty aıtqan», — deıdi departamenttegiler.

Osydan keıin zeınetkerge basqa nómirlerden qońyraýlar túse bastaǵan. Olar ózderin «elektrondyq úkimet» qaýipsizdik qyzmetiniń operatorlary, Ulttyq bank jáne qarjy polıtsııasynyń qyzmetkerlerimiz dep tanystyrǵan.

Alaıaqtar egde áıeldi shatastyryp, qorqytqan. Zeınetker depozıttegi barlyq aqshasyn solardyń shotyna aýdaryp bergen. 

— Shyǵyn 9 mıllıon teńgeden asty. Alaıaqtyq baby boıynsha qylmystyq is qozǵaldy, tergeý júrip jatyr», — dep qosty polıtsııa.

Tártip saqshylary azamattardy qyraǵy bolýǵa jáne eshqashan beıtanys adamdarǵa SMS kodtaryn, jeke málimetterin jáne bank shoty týraly aqparatty bermeýge shaqyrdy.

Eske salaıyq, Qostanaıda telefon nómirlerin jalǵa berip, alaıaqtarǵa kómektesken jigit ustaldy.