Jańa kóliginen aqaý anyqtaǵan aqmolalyq 28,3 mln teńgesin tolyq qaıtaryp aldy

ASTANA. KAZINFORM — Jyl basynan beri Aqmola oblysy boıynsha Saýda jáne tutynýshylardyń quqyǵyn qorǵaý departamenti 983 azamattyq ótinishti qarady. Onyń 80 paıyzdan astamy tutynýshylardyń paıdasyna sheshilip, turǵyndarǵa jalpy somasy 82 mln teńgeden astam qarjy qaıtaryldy.

Vedomstvo málimetinshe, bul — departamenttiń júıeli jumysynyń aıqyn nátıjesi. Departament mamandary daýlardy sotqa deıingi tártipte sheshýge erekshe nazar aýdarady. Mundaı tásil azamattarǵa quqyqtaryn jyldam qalpyna keltirýge jáne qarjylyq shyǵyndaryn der kezinde ótetýge múmkindik beredi.

— Máselen, oblys turǵynyna quny 8,1 mıllıon teńge bolatyn qoldanylǵan avtokólikke qatysty shaǵymdy durys rásimdeý arqyly aqshasyn tolyq qaıtarýǵa qoldaý kórsetildi. Taǵy bir turǵyn jańa avtokólikten aqaýlar anyqtalǵan soń satyp alýdan bas tartyp, 28,3 mıllıon teńgeni tolyq kólemde qaıtaryp aldy. Departamenttiń aralasýy turmystyq taýarlar men elektronıka salasynda da sheshýshi ról atqardy. Quny 1 000 200 teńge bolatyn jıhazdyń keshiktirilýi men sapasyz jetkizilýinen zardap shekken oblys turǵynyna mamandar tolyq túsindirý jumystaryn júrgizip, nátıjesinde kásipker kemshilikterdi tolyǵymen joıdy, — delingen habarlamada.

Oblystyq saýda jáne tutynýshylardyń quqyǵyn qorǵaý departamenti eń nazar aýdararlyq jaǵdaılardyń birin aıtyp berdi.

— 70 jastaǵy zeınetker Wildberries platformasynan qyzyna syılamaq bolyp, sıpattamada Redmi 14 modeli dep kórsetilgen telefonǵa tapsyrys bergen. Biraq kelgen taýar múldem basqa bolyp shyqty. Sonymen qatar telefon IMEI-rastaýdan ótpeı, Qazaqstan aýmaǵynda qoldanýǵa jaramsyz ekeni belgili boldy. Satýshydan aqshany tikeleı qaıtarý múmkin bolmaǵandyqtan, azamat departamentke júgingen. Nátıjesinde 34 840 teńge tutynýshyǵa tolyq qaıtaryldy, — dep atap ótti vedomstvo. 

Sonymen birge, demalys bazasyna aldyn ala tólem jasaǵannan keıin qarajatty qaıtarýdan bas tartylǵan jaǵdaıda da departament kómegi mańyzdy boldy. Taraptardyń arasynda bitimgershilikke qol jetkizilip, tutynýshyǵa aqshasy tolyq qaıtaryldy, sondaı-aq oǵan qosymsha bir kúndik demalys jeńildikpen usynyldy.

Kókshetaý turǵynyna kepildik merzimi ishinde anyqtalǵan aqaýdan keıin sapasyz telefon jóndeýi úshin tólengen 22 500 teńge de qaıtaryldy.

Tutynýshylardyń quqyqtaryn qorǵaý salasyndaǵy tıimdilik sot tájirıbesinde de kórinis taýyp otyr. 2025 jyldyń 11 aıynda departament úshinshi tulǵa retinde 15 sot isine qatysyp, nátıjesinde azamattar paıdasyna 9,9 mıllıon teńgeden astam qarajat óndirilip berildi. Bul — óńirde tutynýshy quqyqtarynyń júıeli ári nátıjeli qorǵalyp jatqanyn dáleldeıdi.

Osydan buryn sapasyz kosmetologııalyq qyzmet kórsetken salon qostanaılyqqa 1,2 mln teńge qaıtarǵanyn jazǵanbyz.