Aqmolalyq volonterler sý tasqynymen belsendi kúresip, turǵyndarǵa kómektesip jatyr
KÓKShETAÝ. KAZINFORM – Aqmola oblysynda volonterler sý tasqynymen kúresý jáne aldyn alý sharalaryna atsalysyp jatyr. Volonterler qar kúreý, aryqtardy tazalaý jumystary kezinde jáne qutqarýshylar men sý tasqynynan zardap shekkenderdi ystyq tamaqpen qamtamasyz etýde belsendilik tanytty.
Tselınograd aýdanynyń Qaraótkel aýylynda volonterler qart adamdar turatyn úılerdiń aýlalaryndaǵy qardy kúrep, sý aǵatyn jyralardy tazartýǵa kómektesýde. Budan bólek, volonterler aýyldaǵy úılerge sý kirmeýi úshin 500 qapqa qum toltyryp qoıdy. Osyndaı jumystary Qoshqarbaev jáne Qabanbaı aýyldarynda qolǵa alyndy, munda ári aýylda 750 qaptan ázirlendi. Sonymen birge, volonterler sý tasqynynan japa shekkender men qutqarýshylardy ystyq shaı jáne tamaqpen qamtamasyz etip jatyr.
Qosshy qalasy men Taıtóbe aýylynyń aýmaǵynda sý tasqynyna qarsy is-sharalar aıasynda topyraqtan turǵyzylǵan jasandy bógettiń osal tusyn nyǵaıtý úshin 150 adam, 4 arnaıy tehnıka jumyldyrylǵan. Onda volonterlerdiń kómegimen 200 tonna ınerttik materıaldar qaptarǵa salynyp, tóseldi. Sonymen qatar qalanyń jeke shaǵyn aýdandarynda 9 arnaıy tehnıka qardy kúrep shyǵaryp jatyr. 19 shaǵyn aýdanda, Aral jáne Qajymuqan kóshelerinde 5 sýsorǵysh mashına erigen qar sýyn sorýda. Taıtóbe aýylynda uzyndyǵy 1 shaqyrym bolatyn sý bógeti turǵyzyldy. Onda 3 arnaıy tehnıka jumys istep jatyr.
Ereımentaý adanynyń jastar resýrstyq ortalyǵynyń jáne Agrotehnıkalyq kolledjiniń volonterleri qala ákimdigine sý tasqynyna qarsy jumysta kómek kórsetip jatyr. Jeti volonterler qaptardy ınertti materıalmen toltyryp, sý basý qaýpi bar turǵyn úılerdiń aınalysyna qoıdy.
Býrabaı aýdanynda qazirgi ýaqytta jaǵdaı turaqty. Degenmen Şýche qalasynda jastar resýrstyq ortalyǵy men «Lıder.kz. Dobroe serdtse» qoǵamdyq qorynyń 5 adamnan turatyn volonterleri sý tasqynynyń aldyn alý jumystarymen aınalysyp júrgen kommýnalyq qyzmetter men TJD qyzmetkerlerine ystyq shaı, baýyrsaq úlestirip jatyr.
Atbasar aýdanynda 15 adamnan turatyn volonterler shtaby quryldy. Olar sý basý aımaǵynda turatyn turǵyndarǵa habarlamalar taratyp jatyr. Sondaı-aq jalǵyzbasty zeınetkerler turatyn úılerdiń mańyn qardan tazartyp, sý aǵarlaryn retke keltirdi.
Arshaly aýdanynda volonterler sý tasqynyna qarsy kúresip jatyr. Zerendi aýdanynyń Shaǵalaly aýylynan 20, Sadovyı aýylynan 5 jáne Alekseevka aýylynan 10 volonter sý tasqynyna qarsy kúresýde belsendilik tanytty.
Sandyqtaý aýdanynda shtattyq rejımde jumys júrgizilip jatyr. Osy kezeńde volonterler negizinen jalǵyzbasty zeınetkerlerge kómektesýdi nazarǵa aldy. Olar turǵyn úılerdi sýdan qorǵaý úshin aýladaǵy ergin qar sýyn syrtqa aǵyzý úshin jyralar jasady. Ár aýyldyq okrýgte 7-10 volonterden bar. Shamamen barlyǵy 70-85 volonter atsalysyp jatyr.
Al Kókshetaý qalasy boıynsha Aqmola oblysy «Volonterlerdi qoldaý ortalyǵy» front-keńsesi jáne «Dobroe serdtse. Lıder.kz» qoǵamdyq qorynyń volonterleri TJD jáne PD qyzmetkerlerin, kommýnaldyq qyzmet jumysshylaryn, sondaı-aq sýt tasqynynan zardap shekkenderdi ystyq taǵamdarmen qatamasyz etti.
Sonymen qatar volonterlerdiń kómegimen sý basý qaýpi bar aýmaqtarǵa ınertti materıaldar tóseý, aryqtardy ashý jáne qar men muzdan tazartý jumystary júrgizilip jatyr. Qazirgi ýaqytta Kókshetaý qalasynda eki mekenjaı boıynsha gýmanıtarlyq kómek orny bekitilip, pýnkt qajetti zattardy qabyldap jatyr. Sonyń biri Aqmola oblysynyń Jastar-resýrstyq ortalyǵy janyndaǵy «Volonterlerdi qoldaý ortalyǵy» front-keńsesi men «QR Qyzyl Jarty Aı» qoǵamdyq birlestiginiń Aqmola oblysy boıynsha fılıaly birlesip uıymdastyrǵan M.Saǵdıev kóshesi 29, 1 qabat mekenjaıda ornalasqan pýnkti.
«Búgingi kúni atalǵan qabyldaý pýnktinde 800 kg jýyq qajetti zat jınaldy. Shamamen 50 volonterdiń qatysýymen sý tasqyny saldarynan zardap shekken 50 adamǵa gýmanıtarlyq kómek kórsetildi», - dedi Aqmola oblysynyń Jastar-resýrstyq ortalyǵynyń qyzmetkeri Jeńis Balabekov.
Aıta ketsek, budan buryn Aqmola oblysyna Astana qalasynan 85-ke jýyq tehnıka kómekke kelgenin jazǵan edik
