Aqmolalyq sheneýnik jetim balaǵa arnalǵan páterde eki jyl turdy

ASTANA. KAZINFORM — Prokýratýra Aqmola oblysynda jetim jáne ata-anasynyń qamqorlyǵynsyz qalǵan balalardyń turǵyn úı quqyqtarynyń buzylýyn anyqtady, dep habarlaıdy Kazinform tilshisi.

— Qoldanystaǵy zańnamaǵa sáıkes, osy sanattaǵy balalardyń baspana alýǵa basym quqyǵy bar. Bul rette jergilikti atqarýshy organdar balalardyń memlekettik turǵyn úı qorynan baspana alý quqyǵyn buzdy, — dep habarlady Aqmola oblysynyń prokýratýrasy.

Osylaısha, vedomstvonyń málimetinshe, 33 bala tirkeýden zańsyz shyǵaryldy, taǵy segizi kezekke der kezinde qoıylǵan joq. Bir balaǵa tipti baspana alýǵa ruqsat etilmegen. 

Máselen, aýdan ortalyqtarynyń birinde memlekettik mekeme basshysy jetim balaǵa arnalǵan páterde eki jyl turyp keldi.

— Qadaǵalaý aktisine sáıkes páter qaıtarylyp, balaǵa berildi, qazirgi kezde basqa balalardyń buzylǵan quqyqtaryn qalpyna keltirý sharalary júrgizilip jatyr, — dep tolyqtyrdy vedomstvodan.

Buǵan deıin Kókshetaýda jaǵalaý qurylysy kezinde 170 mln teńge urlanǵanyn jazǵan bolatynbyz. Aqmola oblysy prokýratýrasynyń habarlaýynsha, Kókshetaý qalasy ákimdigi turǵyn úı-kommýnaldyq sharýashylyǵy bóliminiń jáne «M-Stroı proekt» JShS tehnıkalyq qadaǵalaý bóliminiń burynǵy basshylary, sondaı-aq «PavlodarEnergoMontaj» JShS merdigerlik uıymynyń is júzindegi ıesi ustalyp, ýaqytsha ustaý ızolıatoryna qamaýǵa alyndy.