Aqmolalyq polıtseıler jolda qalǵan sheteldikterge der kezinde kómek kórsetti

KÓKShETAÝ. KAZINFORM — Aqmola oblysynda polıtseıler jolda qalyp qalǵan júrgizýshilerge kómek kórsetti, — dep habarlaıdy Rolisia.kz.

Astana–Şýchınsk avtojolynda aýa temperatýrasy -26 gradýsqa deıin tómendegen. Qatty aıaz kezinde polıtsııa qyzmetkerleri jolda qıyn jaǵdaıǵa tap bolǵan birneshe júrgizýshige kómek kórsetti.

Tómen temperatýranyń saldarynan júk kólikteriniń birinde dızel janarmaıy qatyp, aýa berý júıesi isten shyqqan. Olardyń Qyrǵyz Respýblıkasynyń azamattary ekeni belgili boldy. Polıtseıler jolaýshylardy Aqkól qalasyna jetkizip, qonaq úıge ornalastyrdy.

Júk kóligin jyly boksqa qoıyp, kelesi kúni tolyqtaı jóndeýden ótkizdi. Júrgizýshiniń aıtýynsha, olar Tıýmen qalasynan Bishkekke baǵyt alǵan. Jolaýshylar oqys jaǵdaıda kómektesken aǵa ınspektor Konstantın Mýsın men Jeńis Álibekovke  alǵys bildirdi.

Sonymen qatar avtojoldy tekserý barysynda taǵy bir jaǵdaı anyqtaldy. Bul joly Mercedes Vito avtokóliginiń de dızel otyny qatyp qalǵan.

Polıtsııa qyzmetkerleri jol uıymdarynan kómek surap, avtokólik Bozaıǵyr eldi mekenine deıin jetkizildi. Al júrgizýshi men jolaýshy jolaı ótip bara jatqan kólikke otyrǵyzylyp, saparyn ármen qaraı jalǵastyrdy.

Jolaýshylar jedel kómek kórsetken patrýldik polıtsııa ınspektorlary Nursultan Saǵyndyqov pen Azat Muhataevqa rızashylyǵyn bildirdi. Tártip saqshylary tek zańnyń saqtalýyn qadaǵalap qana qoımaı, qıyn sátte de kómekke kelýge ázir.

— Jol ústinde kórsetken adamgershilik qarym-qatynastary men qoldaýlary úshin polıtseılerge alǵys bildiremin, – dedi jolaýshylardyń biri.

Polıtsııa ókilderi qatty aıaz kezeńinde, ásirese dızel otynymen júretin kólikterdiń qatyp qalý jaǵdaılarynyń edáýir artatynyn atap ótti.

Osyǵan baılanysty quqyq qorǵaý organdary dızel otynyn paıdalanatyn júrgizýshilerge aýa raıy asa sýyq kúnderi múmkindiginshe jolǵa shyqpaýǵa keńes beredi. Bul jol-kólik oqıǵalarynyń aldyn alyp, ómirge tónetin qaýiptiń boldyrmaýyna kómektesedi.

Eske sala keteıik, buǵan deıin Pavlodarda aıazda jolda qalǵan avtobýstan 35 jolaýshy qutqaryldy.