Aqmolalyq polıtseıler aýa raıyna baılanysty júrgizýshilerge eskertý jasady

ASTANA. KAZINFORM – Sońǵy kúnderi Aqmola oblysynda aýa raıy kúrt ózgerip, jańbyr aralas qar jaýa bastady. Polıtsııa qyzmetkerleri joldarda kóktaıǵaq bolýy múmkin ekenin eskertip, júrgizýshilerdi saqtyq sharalaryn kúsheıtýge shaqyrdy.

Vedomstvonyń málimetinshe, aýa temperatýrasynyń tómendeýine baılanysty jol qozǵalysy qıyndap, jol-kólik oqıǵalarynyń týyndaý qaýpi artyp otyr.

- Osyǵan oraı tártip saqshylary kólik ıelerine qys maýsymyna aldyn ala daıyndyq júrgizýdi usynady: jazǵy dóńgelekterdi qysqy túrine aýystyrý, jyldamdyqty azaıtý jáne araqashyqtyqty saqtaý qajet, - dep eskertti jol saqshylary.

Polıtsııa barlyq júrgizýshini jolda asa muqııat bolyp, aýa raıy jaǵdaıyn baqylap otyrýǵa shaqyrdy.

Aıta keteıik, SQO-da qys qarsańynda 4 myń shaqyrym jol tekserilip, birqatar kemshilik anyqtaldy.