Aqmolalyq donordyń búırekteri kútý paraǵynda turǵan eki patsıentke aýystyryldy
ASTANA. KAZINFORM — Aqmola oblysynda Transplantattaýdy jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyqtyń úılestirýimen donorlyq protsess júrgizildi, dep habarlaıdy DSM baspasóz qyzmeti.
Mınıstrliktiń málimetine sáıkes, mıdyń aýyr qantamyrlary aýrýyna shaldyqqan 1959 jylǵy patsıent kópbeıindi oblystyq aýrýhanaǵa jatqyzyldy. Zerttep-qaraý nátıjeleri boıynsha dárigerler úlken bassúıekishilik qan ketýmen asqynǵan mıdyń qan tamyrlary anevrızmasynyń jarylýy dıagnozyn qoıdy. Birneshe kún boıy medıtsınalyq top qarqyndy emdeý men baqylaý júrgizdi, biraq barlyq qabyldanǵan sharaǵa qaramastan, patsıenttiń ómirin saqtap qalý múmkin bolmady. Dárigerler konsılıýmy mıdyń ólimin rastady. Túsindirme áńgimeden keıin týystary qaıtys bolǵannan keıingi donorlyqqa kelisim berdi.
— Ortalyq uıymdastyrǵan donorlyq protsesiniń sheńberinde eki búıregi alynyp, «UǴOO» JShS-na jedel jetkizildi. Transplanttaý 1975 jáne 1994 jyly týǵan Astana qalasynan kútý paraǵynda turǵan eki patsıentke aýystyryldy. Densaýlyq saqtaý mınıstrligi donordyń otbasyna basqa patsıentterge ómirlik mańyzdy medıtsınalyq kómek kórsetýge múmkindik beretin sheshim qabyldaǵany úshin rızashylyǵyn bildiredi, — delingen habarlamada.
Bul jaǵdaı 2026 jyldyń basynan beri úshinshi donorlyq protsess boldy. Búgingi tańda Qazaqstanda 4,5 myńnan astam adam aǵzalaryn transplantattaý jalǵasyp keledi.
Osyǵan deıin Pavlodarda donor áıel tórt adamnyń ómirin uzartýǵa sebepshi bolǵanyn jazǵanbyz.