Aqmolalyq dıqandar kóktemgi egiske qyzý kiristi

KÓKShETAÝ. KAZINFORM — Aqmolalyq dıqandar kóktemgi egis jumystaryna qyzý kiristi. Búgingi kúni 510 myń gektarǵa egin sebildi.

Aqmola oblysy aýyl sharýashylyǵy basqarmasy basshysynyń orynbasary Erkesh Álenovtyń málimetinshe, bıyl oblys boıynsha egisti 5,3 mıllıon gektardan astam alqapta júrgizý josparlanǵan. 

Onyń 4,6 mıllıon gektaryna dándi daqyldar, 400 myń gektaryn maıly daqyldar sebiledi.

Azyqtyq daqyldardyń aýmaǵy 340 myń gektardy quraıdy.

Sonymen birge, 4,4 mıllıon gektarda ylǵal jabyldy. Bul — ótken jylǵy deńgeıden birshama kóp.

«Naýqanǵa 15 myń traktor men 16 myń dana egis seıalkalary jáne 1,5 joǵary ónimdi egis keshenderi qatystyrylýda. Jumys josparyna sáıkes, oblysta kóktemgi egis jumystaryn 20 kúnniń ishinde aıaqtaý kózdelip otyr» dep túsindirdi basqarma basshysynyń orynbasary.

Aıtýynsha, qazirgi kezde dıqandar kóktemgi egis jumystaryna qyzý kiristi.

Búgingi kúni 510 myń gektarǵa egin sebildi. Bul — josparlanǵan barlyq egistik alqaptyń ázirge 10 paıyzy.

Eske salaıyq, ótken jyldyń kúzinde aqmolalyq dıqandar 3 mıllıon tonadan astam astyq jınady.