Aqmolalyq áıel jalǵan ınternet jeńildigine aldanyp, 5 mln teńgesinen qaǵyldy
ASTANA. KAZINFORM — Alaıaqtar «Qazaqtelekom» AQ qyzmetkerleriniń atyn jamylyp, áıelge ınternet qyzmetine jeńildik usynǵan.
Aqmola oblystyq polıtsııa departamentiniń málimetinshe, Býrabaı aýdanynyń turǵyny taǵy bir onlaın alaıaqtyq saldarynan qomaqty qarjy joǵaltqan.
— Zardap shegýshiniń uıaly telefonyna belgisiz bireý «Qazaqtelekom» AQ qyzmetkerimin dep qońyraý shalǵan. Qońyraý shalýshy oǵan ınternet qyzmetterine jeńildik alý múmkindigi týraly habarlap, ony yntalandyrý úshin birqatar áreketterdi jasaýǵa kóndirgen, sonyń ishinde oǵan jiberilgen faıldy ashqan. Faıldy ashqannan keıin shaǵymdanýshynyń mobıldi qurylǵysy jumysyn toqtatqan, — dep habarlady departament.
Qaýipti túsingen áıel bank shottary men mobıldi qosymshalaryn buǵattaýǵa tyrysqan. Alaıda, qurylǵyǵa qol jetkizgen shabýyldaýshylar jábirlenýshiniń depozıttik shotynan bes mıllıon teńgeni shottaryna aýdaryp úlgergen.
— Qazir shot ıeleri anyqtaldy. Qajetti tergeý jáne jedel-izdestirý sharalary júrgizilip jatyr, — dep qosty polıtsııa.
Quqyq qorǵaý organdarynyń qyzmetkerleri azamattardy taǵy da saq bolýǵa shaqyrady: belgisiz adamdardan alynǵan faıldar men siltemelerdi ashpańyz, tipti olar ózderin tanymal kompanııalar nemese uıymdardyń qyzmetkerleri dep tanystyrsa da; rastalmaǵan kózderden qoldanba ornatpańyz nemese olarǵa jeke derekterge qol jetkizýge ruqsat bermeńiz jáne qupııa aqparatty, sonyń ishinde SMS habarlamalardaǵy kodtardy jarııa etpeńiz.
Esterińizge sala keteıik, biz buǵan Petropavl turǵyny ınternet alaıaqtarǵa aldanyp, páterinen aıyrylǵanyn jazǵanbyz.
