Aqmolalyq áıel aýrýhanada túsik tastady: aýrýhana jazba avtoryn sotqa bermek
ASTANA. KAZINFORM — Aqmola oblystyq № 2 kópbeıindi aýrýhanada júkti áıel sábıinen aıyrylyp qaldy. Oqıǵanyń mán-jaıyn Aqmola oblystyq densaýlyq saqtaý basqarmasynyń baspasóz qyzmeti túsindirdi.
Birer kún buryn jeli qoldanýshysynyń júkti áıeldiń aýrýhanada túsik tastaǵany týraly jazbasy keńinen talqylandy.
Onyń málimdeýinshe, áıelden qan ketip, sábıinen aıyrylǵan, al dárigerler kómekke 1 saǵat 45 mınýttan keıin ǵana kelgen.
— Patsıent № 2 oblystyq kópbeıindi aýrýhanasynyń gınekologııa bólimine «Erte merzimdegi júktiliktiń úzilý qaýpi» dıagnozymen tústi. Qabyldaý kezinde ishtiń tómengi jaǵynda aýyrsyný jáne qan aralas bólindi baıqaldy. Júktilikti saqtaý maqsatynda sımptomdyq em jáne gormonaldy terapııa taǵaıyndaldy. Erte merzimde ózdiginen túsik boldy jáne qandy toqtatý áreketi jasaldy, — degen jaýap aldyq óńirlik densaýlyq saqtaý basqarmasynan.
Aqparatta aıtylǵandaı, áıel besinshi ret júkti bolǵan, buǵan deıin, ıaǵnı 2021 jyly patsıentte úı jaǵdaıynda túsik bolǵan.
— Atalǵan jaǵdaı qursaqishilik sharana nemese sábı ólimi emes. Sebebi embrıon — uryq jumyrtqasynyń mólsheri 3–6 mm shamasynda. Bul merzimde áıelge akýsherlik blokta emes, gınekologııa bóliminde medıtsınalyq kómek kórsetiledi. Áıelge baqylaý jáne súıemeldeý barlyq rettelgen medıtsınalyq hattamaǵa sáıkes júrgizildi, — dep túsindirildi.
Odan bólek, atalǵan jaıtqa qatysty № 2 Aqmola oblystyq kópbeıindi aýrýhanasynyń dırektory Izat Bıýrabekov túsinik berdi.
— Patsıent júktiliktiń úzilý qaýpimen 25 shilde kúni saǵat 21:54–te bizdiń aýrýhanaǵa jetkizildi. Júktilikti saqtaý úshin barlyq tıisti shara qabyldandy. Alaıda, ókinishke qaraı, keı jaǵdaıda organızmniń em-sharany qabyldamaý jaǵdaıy bolyp turady. Bul jaǵdaıda uryqtyń túsip qalý protsesi jalǵasty, ıaǵnı qarapaıym tilmen aıtqanda, tabıǵı túsik boldy. Mundaı jaǵdaı júktiliktiń erte merziminde kezdesedi, áıeldiń aǵzasy qandaı da bir sebeptermen uryqty qabyldamaýy múmkin. Patsıenttiń júktilik merzimi 6 apta jáne 5 kún bolǵan. Bul kezeńde embrıonnyń kólemi 3–6 mm-den aspaıdy, onyń aıaq-qoly men aǵzasy áli qalyptaspaǵan, — deıdi ol.
Sondaı-aq aýrýhana basshysy jelide jarııalanǵan jazbada ásireleý men burmalaý baryn aıtyp otyr.
— Ásirese, áıel bosanǵan balasyn joǵaltty degen tujyrym, shyndyqqa sáıkes kelmeıdi. Ol uryq jumyrtqasy, embrıon bolatyn. Patsıent qansyrap jatty degenge kelsek, ıá, shyn máninde patsıentte qan ketý boldy. Aıta ketý kerek, taldaý nátıjesi boıynsha onyń gemoglobın deńgeıi qalypty shekte boldy. Patsıent baqylaýda boldy, bir jarym, eki saǵat saıyn tekserý júrgizildi. Qan ketý baıqalǵan jaǵdaıda, basqa emdik taktıka qoldanylatyny belgili. Patsıent baqylaýshy organdarǵa shaǵym jazýdan bas tartty. Al jarııalanym avtoryna qatysty, aýrýhana Azamattyq kodekstiń 143-babyna sáıkes, «Ar-namys, qadir-qasıetti jáne iskerlik bedeldi qorǵaý» boıynsha sotqa talap daıyndap jatyr, — dep túsindirdi I.Bıýrabekov.
Buǵan deıin Kazinform tilshisi túsik jáne ýaqytynan buryn bosanýdyń sebebin anyqtaǵan edi.